मुंबई: येत्या १९ मार्च रोजी गुढीपाडवा साजरा होत असून हा सण साडेतीन मुहूर्तांपैकी एक शुभ मुहूर्त मानला जातो. यंदा सुरू होणाऱ्या शालिवाहन शक १९४८ या नूतन वर्षाचे नाव ‘पराभव’ संवत्सर असल्याची माहिती पंचांगकर्ते व खगोल अभ्यासक दा. कृ. सोमण यांनी दिली.
सोमण यांच्या मते, गुरुवारी सकाळी ६.५३ नंतर गुढी उभारून गुढीपाडव्याचा सण साजरा करावा. यंदा चैत्र शुक्ल प्रतिपदा ही तिथी सूर्योदयाच्या वेळी नसल्यामुळे तिला ‘क्षयतिथी’ मानले जाते.
फाल्गुन अमावास्या तिथी सकाळी ६.५३ वाजता संपल्यानंतर नव्या वर्षाची सुरुवात होत असून त्या वेळेनंतर गुढी उभारणे शुभ मानले जाते.
नूतन वर्षाचे नाव ‘पराभव’ संवत्सर असून त्याचा अर्थ अनीती, असत्य, दुष्टपणा, स्वार्थ आणि भ्रष्टाचाराने वागणाऱ्यांचा पराभव होणे असा घेतला जातो, असेही सोमण यांनी स्पष्ट केले.
हिंदू पंचांगानुसार संवत्सरांची एकूण ६० नावे असून ती क्रमाने येत असतात.
यापूर्वी २८ मार्च २०१७ रोजी चैत्र शुक्ल प्रतिपदेची ‘क्षयतिथी’ आली होती. त्यावेळी अमावास्या संपल्यानंतर गुढीपाडव्याचा सण साजरा करण्यात आला होता. यानंतर अशी स्थिती पुन्हा १० एप्रिल २०३२ रोजी येईल, अशी माहितीही सोमण यांनी दिली.
