महाड : महाड-दापोली राज्य मार्गावरील करंजाडी येथील उतारावर ठेकेदाराने मनमानी पद्धतीने टाकलेला अनधिकृत स्पीड ब्रेकर अपघातास कारणीभूत ठरत आहे. नुकताच या ठिकाणी एक अवजड ट्रक घसरून रस्त्याच्या बाजूला धडकला असून सुदैवाने जीवितहानी टळली. मात्र, या ठिकाणी अपघातांची मालिका सुरूच असून, या सगळ्याची जबाबदारी ठेकेदारावर टाकत, त्याच्याविरोधात सदोष मनुष्यवधाचा गुन्हा दाखल करण्यात यावा, अशी जोरदार मागणी शिरगाव ग्रामपंचायतचे सरपंच सोमनाथ ओझर्डे यांनी केली आहे. अन्यथा तीव्र आंदोलनाचा इशाराही त्यांनी दिला आहे.
महाड-दापोली मार्गावर गेल्या आठवड्यात रस्त्याच्या पृष्ठभागावर खडी टाकून रोलरने दाबण्याचा प्रयोग करण्यात आला होता. तो अयशस्वी ठरल्याने स्थानिक ग्रामस्थ व वाहनचालकांतून तीव्र नाराजी व्यक्त करण्यात आली. त्यानंतर सार्वजनिक बांधकाम विभागाने त्याच ठिकाणी नवा प्रयोग करत अचानकपणे स्पीड ब्रेकर टाकले. मात्र पावसामुळे स्पीड ब्रेकरवर मारलेले पांढरे पट्टे वाहून गेल्याने रात्रीच्या वेळेस वाहनचालकांना स्पीड ब्रेकरचा अंदाज न येता गाड्या घसरत आहेत.
या ठिकाणी कोणतीही पूर्वसूचना, नामफलक वा रिफ्लेक्टर लावले गेलेले नाहीत. त्यामुळे हे स्पीड ब्रेकर नियमबाह्य आणि जीवघेणे असल्याचे वाहनचालक व प्रवासी वर्गाने स्पष्ट केले आहे. अशाच प्रकारच्या स्पीड ब्रेकरमुळे नुकताच एक ट्रक घसरून भिंतीला जाऊन धडकला. यात जीवितहानी झाली नसली तरी भविष्यकाळात मोठा अपघात होण्याची शक्यता नाकारता येत नाही.
“सार्वजनिक बांधकाम विभागाचे शाखा अभियंते अनुपस्थित असताना, ठेकेदाराने मनमानीने केलेले हे काम म्हणजे जनतेच्या जिवाशी खेळ आहे. याची जबाबदारी निश्चित करून संबंधित ठेकेदारावर सदोष मनुष्यवधाचा गुन्हा दाखल करावा,” अशी मागणी सरपंच ओझर्डे यांनी केली आहे.
या प्रकरणी महाड सार्वजनिक बांधकाम उपविभागाचे उपविभागीय अभियंता सनाळकर यांच्यावरही प्रश्नचिन्ह उपस्थित केले जात असून, प्रशासन पुढे येऊन तात्काळ कारवाई करते की आणखी एखादा अपघात होईपर्यंत वाट पाहते, हा मोठा प्रश्न स्थानिक नागरिक आणि प्रवासी विचारू लागले आहेत.
