ठाणे: येत्या बुधवारी, ५ नोव्हेंबर रोजी त्रिपुरारी पौर्णिमेच्या रात्री आकाशात एक मनमोहक खगोलीय दृश्य पाहायला मिळणार आहे. या दिवशी सुपरमूनचे दर्शन होणार असल्याची माहिती पंचांगकर्ते व खगोल अभ्यासक दा. कृ. सोमण यांनी दिली.
अधिक माहिती देताना त्यांनी सांगितले की, पौर्णिमेच्या दिवशी चंद्र पृथ्वीच्या अधिक जवळ आल्यास त्याचे बिंब नेहमीपेक्षा मोठे आणि अधिक तेजस्वी दिसते. यालाच सुपरमून असे म्हणतात. बुधवारी रात्री आपणास असा तेजस्वी व नेत्रदीपक चंद्र दिसणार आहे.
साधारणतः चंद्र पृथ्वीपासून ३,८४,००० कि.मी. अंतरावर असतो. परंतु, या रात्री तो पृथ्वीपासून फक्त ३,५६,८३४ कि.मी. अंतरावर येणार आहे. त्यामुळे चांद्रबिंब साधारणतः १३ टक्के मोठे आणि ३० टक्के अधिक तेजस्वी दिसेल.
याउलट, पौर्णिमेच्या दिवशी चंद्र पृथ्वीपासून अधिक दूर असल्यास चंद्र लहान आणि कमी प्रकाशमान दिसतो — याला मायक्रोमून म्हणतात.
या विशेष रात्री सायंकाळी ५.४४ वाजता चंद्र पूर्व दिशेला उगवेल आणि संपूर्ण रात्र आकाशात दर्शन देईल.
या पुढील सुपरमून ४ डिसेंबर रोजी दत्तजयंतीच्या रात्री पाहायला मिळेल, असेही सोमण यांनी सांगितले.
