मुंबई :  कामगार राज्य विमा योजना रुग्णालय, कांदिवली (पूर्व), मुंबई येथील रक्तपेढी विभागात तंत्रज्ञ म्हणून कार्यरत असलेले तसेच सर्वाधिक रक्तदान शिबिरे आयोजित करण्याचा विक्रम करणारे श्रीधर बुधाजी देवलकर यांना शिव आरोग्य सेनेतर्फे कथाकार, कवी आणि व्यंगचित्रकार या विशेष पुरस्काराने सन्मानित करण्यात आले.

हा छोटेखानी सन्मान सोहळा शिवसेना भवन, दादर येथे शिव आरोग्य सेनेच्या वतीने आयोजित करण्यात आला होता. शिवसेना – शिव आरोग्य सेनेचे सरचिटणीस जितेंद्र सकपाळ यांच्या शुभहस्ते हा सन्मान प्रदान करण्यात आला.

राज्यस्तरीय छायांकित दिवाळी अंक २०२५ साठी ‘पोस्टमन’ या विषयावर कथा व कविता सादर करण्याचे आवाहन करण्यात आले होते. त्या अनुषंगाने श्री. देवलकर यांनी लिहिलेल्या कथा व कविता या दिवाळी अंकात प्रसिद्ध झाल्या असून त्यांच्या साहित्यिक योगदानाची दखल घेत हा पुरस्कार प्रदान करण्यात आला. या कार्यक्रमास शिव आरोग्य सेनेचे पदाधिकारी सय्यद साठविलकर, अजित पाटील यांच्यासह अन्य मान्यवर उपस्थित होते.