मुंबई : मुंबईतील **नायर डेंटल कॉलेजच्या वसतिगृहात अस्वच्छ व असुरक्षित परिस्थिती निर्माण झाल्याची तक्रार समोर आली असून, त्यावर तात्काळ कारवाई करण्याची मागणी करण्यात आली आहे. वैद्यकीय शिक्षण घेणाऱ्या विद्यार्थ्यांना मूलभूत व दर्जेदार सुविधा मिळणे अपेक्षित असताना वसतिगृहातील परिस्थिती चिंताजनक असल्याचे सांगितले जात आहे.
माध्यमांमध्ये प्रसिद्ध झालेल्या वृत्तांनुसार, वसतिगृहात अनेक दिवस नियमित स्वच्छता झालेली नाही. काही मजल्यांवर कचरा साचल्याचे, स्वच्छतागृहांची अवस्था दयनीय असल्याचे तसेच परिसरात दुर्गंधी पसरल्याचे सांगितले जात आहे. या परिस्थितीत सुमारे २०० ते ३०० विद्यार्थी, त्यात इंटर्न डॉक्टरांचाही समावेश, राहण्यास बाध्य असल्याचेही समोर आले आहे.
विद्यार्थ्यांच्या आरोग्य, सुरक्षितता आणि सन्मानाशी संबंधित हा गंभीर प्रश्न असल्याचे नमूद करत संसर्गजन्य आजारांचा धोका वाढण्याची शक्यता व्यक्त करण्यात येत आहे. तसेच अशा वातावरणाचा विद्यार्थ्यांच्या मानसिक आरोग्यावर आणि शैक्षणिक कामगिरीवरही परिणाम होऊ शकतो, अशीही चिंता व्यक्त केली जात आहे.
प्राथमिक माहितीनुसार, सफाई कंत्राटदार कंपनीच्या कर्मचाऱ्यांना वेतन न मिळाल्यामुळे स्वच्छतेचे काम काही दिवसांपासून ठप्प असल्याचे सांगितले जात आहे. या संपूर्ण परिस्थितीबाबत संबंधित प्रशासनाने तातडीने लक्ष घालून आवश्यक उपाययोजना कराव्यात, अशी मागणी करण्यात आली आहे.
तसेच वैद्यकीय शिक्षण संस्थांमधील वसतिगृह व्यवस्थापनासाठी दीर्घकालीन व जबाबदार यंत्रणा उभारण्याची गरज व्यक्त करण्यात आली आहे. विद्यार्थ्यांना सुरक्षित, स्वच्छ आणि सन्मानजनक वातावरण उपलब्ध करून देण्यासाठी शासनाने तात्काळ पावले उचलावीत, अशी मागणी करण्यात येत आहे.
विद्यार्थ्यांचे आरोग्य प्रश्न
