मुंबई : जनता दल (सेक्युलर) चे राष्ट्रीय अध्यक्ष व माजी पंतप्रधान एच. डी. देवेगौडा यांच्या सल्ल्यानुसार, महाराष्ट्र प्रदेशाध्यक्ष नाथाभाऊ शेवाळे यांनी सुरेंद्रकुमार बाजपेयी यांची मुंबई जनता दल (सेक्युलर) च्या अध्यक्षपदी नियुक्ती केली आहे.

बाजपेयी यांनी यापूर्वी महाराष्ट्र प्रदेश कार्याध्यक्ष म्हणून काम पाहिले असून, आता त्यांच्यावर मुंबईतील पक्ष संघटनेच्या बळकटीकरणाची जबाबदारी सोपविण्यात आली आहे. ते व्यवसायाने संगणक अभियंता आणि वकील असून, त्यांच्या तांत्रिक व कायदेशीर अनुभवाचा पक्षाला उपयोग होईल, अशी अपेक्षा व्यक्त करण्यात आली आहे.

प्रदेशाध्यक्ष नाथाभाऊ शेवाळे यांनी सांगितले की, पक्षाची संघटनात्मक बांधणी तळागाळापर्यंत मजबूत करण्याच्या रणनीतीनुसार ही नियुक्ती करण्यात आली आहे.

नियुक्तीनंतर सुरेंद्रकुमार बाजपेयी यांनी राष्ट्रीय आणि प्रदेश नेतृत्वाचे आभार मानत मुंबईच्या सर्वांगीण विकासासाठी काम करण्याची ग्वाही दिली. “सामान्य नागरिकांना भेडसावणाऱ्या नागरी समस्यांवर लक्ष केंद्रित करून मुंबईत जनता दल (सेक्युलर) ला एक पर्यायी राजकीय शक्ती म्हणून उभे करण्याचा आमचा प्रयत्न असेल,” असे त्यांनी सांगितले.

याचवेळी, हाजी सलीम भट्टी यांची मुंबई जनता दल (सेक्युलर) च्या प्रभारी अध्यक्षपदी नियुक्ती करण्यात आली आहे. त्यांनी अल्पसंख्याक समाजाच्या प्रश्नांवर लक्ष केंद्रित करण्याची भूमिका मांडली.

मुंबई जनता दल (सेक्युलर) चे माजी अध्यक्ष प्रभाकर नारकर यांची महाराष्ट्र जनता दल (सेक्युलर) च्या कार्याध्यक्ष व प्रधान सरचिटणीस पदावर नियुक्ती करण्यात आली आहे.