X : @therajkaran
मुंबई: राज्यभरांतील ६५ हजार शाळांतील विद्यार्थ्यांमधील कलागुणांना वाव मिळून व्यक्तीमत्त्व विकास व्हावा, यासाठी देशातील सेलेब्रिटी यांच्याकडून १८ कलांचे ऑनलाईन शिक्षण देण्याचा निर्णय राज्यशासनाने घेतला आहे, अशी माहिती शालेय शिक्षणमंत्री दिपक केसरकर यांनी आज येथे पत्रकार परिषदेत दिली.
ते म्हणाले, संगीत, गायन, नाट्य, वक्तृत्व, चित्रकला आदी कलांचा यामध्ये समावेश आहे. येत्या शैक्षणिक वर्षापासून हा ऑनलाइन कलाशिक्षण प्रकल्प अंमलात येईल. विविध कला क्षेत्रांतील तज्ञ व्यक्ती ऑनलाईन पद्धतीने थेट संवाद साधून विद्यार्थ्यांना प्रशिक्षण देतील. इयत्ता १ ली ते ८ वी पर्यंतच्या विद्यार्थ्यांना हे शिक्षण दिले जाणार आहे. विद्यार्थ्यांनी या कला किती आत्मसात केल्या आहेत, याची चाचपणी घेण्यासाठी याविषयी स्पर्धाही घेतल्या जाणार आहेत. यामुळे विद्यार्थ्यांचे व्यक्तिमत्व विकसित होण्यास साहाय्य होईल. शिक्षणमंत्री केसरकर पुढे म्हणाले, यापुढे सोमवार ते शुक्रवार पाठ्यपुस्तकातील अभ्यासाचे असतील. मात्र, शनिवार विद्यार्थ्यांसाठी आनंददायी असेल. शनिवारी विद्यार्थ्यांनी विविध पुस्तकांचे वाचन करावे अशी योजना आहे. खेळ, संगीत, कृषी ज्ञान, आदी उपक्रमही असतील. यासाठी शिक्षण विभागाकडून आराखडा तयार करण्यात येत आहे.
राज्य शासनाने प्राथमिक शाळांची २ दिवसांपूर्वीच वेळ ९ वाजताची केली आहे, विद्यार्थ्यांच्या सोयीसाठी हा बदल करण्यात आला आहे. ज्या शाळा तसे करणार नाहीत, त्यांच्या परवान्यांचे नूतनीकरण होणार नाही, असा इशारा केसरकर यांनी एका प्रश्नाला उत्तर देताना दिला.
