१२० महिला पोलीस अंमलदारांची मॅमोग्राफी तपासणी पूर्ण; आरोग्य जागरूकतेसाठी विशेष उपक्रम
ठाणे: ठाणे पोलीस आयुक्तालयाच्या वतीने जागतिक कर्करोग दिनानिमित्त (World Cancer Day) महिला पोलीस अधिकारी व अंमलदार यांच्यासाठी मोफत कर्करोग तपासणी शिबिर आयोजित करण्यात आले. पोलीस आयुक्त आशुतोष डुंबरे यांच्या मार्गदर्शनाखाली हे शिबिर ५ ते ८ फेब्रुवारी दरम्यान पार पडले. गोपाळ कृष्ण चारिटेबल ट्रस्ट आणि अनिल कॅन्सर क्लिनिक यांच्या सहकार्याने झालेल्या या शिबिरात एकूण १२० महिला पोलीस अंमलदारांची मॅमोग्राफी व इतर तपासण्या करण्यात आल्या.
महिला पोलीस अंमलदारांच्या आरोग्यासाठी महत्त्वाचे पाऊल
कार्यक्रमाचे उद्घाटन डॉ. अशोक नांदापूरकर (उपसंचालक, आरोग्य सेवा, मुंबई मंडळ, ठाणे) यांच्या हस्ते करण्यात आले. यावेळी डॉ. अनिल हेरूर (कर्करोग शल्य चिकित्सक, फोर्टिस हॉस्पिटल), डॉ. स्वप्नील विसपुते (मुख कर्करोग तज्ज्ञ), डॉ. रमेश राठोड (वैद्यकीय अधिकारी, शेंद्रूण शहापूर) आणि पोलीस निरीक्षक प्रकाश वारके (नियंत्रण कक्ष, ठाणे शहर) यांच्यासह अनेक मान्यवर उपस्थित होते.
कार्यक्रमाच्या यशस्वीतेसाठी डॉ. माधव वाघमारे (वैद्यकीय अधिकारी, पोलीस रुग्णालय, ठाणे) यांनी विशेष परिश्रम घेतले. तसेच आरोग्य सेवक कुशल सुखदरे, श्रीमती रिया उत्तेकर, पूजा पवार आणि रमेश जाधव यांनी देखील महत्त्वपूर्ण योगदान दिले.
महिला आरोग्य जागरूकतेला चालना
शिबिरादरम्यान ५ व ६ फेब्रुवारीला ठाणे शहर (५४ महिला), ७ फेब्रुवारीला कल्याण परिमंडळ (३९ महिला), आणि ८ फेब्रुवारीला उल्हासनगर परिमंडळ (२७ महिला) अशा एकूण १२० महिलांची तपासणी करण्यात आली. तपासणीसाठी अत्याधुनिक यंत्रणा असलेल्या मोबाईल व्हॅनचा वापर करण्यात आला.
डॉ. अनिल हेरूर यांनी महिलांना कर्करोगाबाबत जागरूक राहण्याचे आवाहन केले. स्तन, अंडाशय, लिम्फ नोड्स (लसीका ग्रंथी) आणि मऊ पेशींमध्ये कर्करोग होण्याची शक्यता अधिक असल्याने महिलांनी नियमित तपासणी करून आरोग्याकडे लक्ष द्यावे, असे त्यांनी सांगितले.
पोलीस दलातील महिलांचे आरोग्य – एक दुर्लक्षित मुद्दा
पोलीस दलातील महिला अधिकारी आणि अंमलदार कर्तव्य बजावताना स्वतःच्या आरोग्याकडे दुर्लक्ष करतात. वाढत्या तणावामुळे त्यांना वेळेवर वैद्यकीय तपासणी करता येत नाही. या पार्श्वभूमीवर ठाणे पोलीस आयुक्तालयाच्या वतीने आयोजित हे मोफत कर्करोग तपासणी शिबिर महिला पोलीस कर्मचाऱ्यांसाठी एक महत्त्वपूर्ण आरोग्य उपक्रम ठरला आहे.
तपासणीचे अहवाल मिळाल्यानंतर, गरजेनुसार पुढील वैद्यकीय उपचार उपलब्ध करून दिले जातील, असे डॉ. माधव वाघमारे यांनी स्पष्ट केले.
स्त्री आरोग्यासाठी समाज म्हणून अधिक जबाबदारी घ्यायला हवी
कर्करोगासारख्या गंभीर आजारावर वेळेत निदान आणि उपचार झाले, तर तो बरा होऊ शकतो. मात्र, अनेक महिलांना याबाबत माहिती नसल्याने किंवा दुर्लक्षामुळे उशिरा निदान होते. त्यामुळे अशा तपासणी शिबिरांद्वारे महिलांमध्ये जागरूकता निर्माण होणे अत्यंत महत्त्वाचे आहे.
पोलीस दलातील महिलांच्या आरोग्याची विशेष काळजी घेत ठाणे पोलीस आयुक्तालयाने घेतलेला हा पुढाकार निश्चितच कौतुकास्पद आहे!
