मुंबई: फलटण तालुक्यातील डॉ. संपदा मुंडे आत्महत्या प्रकरणी विधानपरिषद उपसभापती डॉ. नीलम गोऱ्हे यांनी गंभीर दखल घेत सातारा जिल्हा रुग्णालय प्रशासनाला मागील दोन वर्षांचा विशाखा समिती अहवाल तात्काळ सादर करण्याचे निर्देश दिले. तसेच सातारा जिल्हा पोलीस अधीक्षक कार्यालयाने या प्रकरणातील चार्जशीट निश्चित वेळेत दाखल करण्याचे आदेश दिले.
या प्रकरणातील कारवाईचा आढावा घेण्यासाठी आयोजित बैठकीत आरोग्य सेवा आयुक्त डॉ. कादंबरी बलकवडे आणि आरोग्य सेवा संचालक डॉ. नितीन अंबाडेकर उपस्थित होते. तर दुरदर्शन प्रणालीद्वारे सातारा जिल्हा पोलीस अधीक्षक तुषार दोषी, जिल्हा शल्यचिकित्सक डॉ. युवराज कर्पे, फलटण उपजिल्हा रुग्णालयाचे वैद्यकीय अधीक्षक डॉ. अंशुमन धुमाळ आणि उपसंचालक डॉ. आर. बी. पवार सहभागी झाले. राज्य महिला आयोगाच्या माजी सदस्या संगीता चव्हाणही या बैठकीत सहभागी होत्या.
फलटण रुग्णालयाचे अधीक्षक डॉ. धुमाळ यांनी दिलेल्या माहितीनुसार, डॉ. संपदा मुंडे या कंत्राटी वैद्यकीय अधिकारी होत्या आणि रुग्णालयातील सहकाऱ्यांशी त्यांचे संबंध चांगले होते. पोस्टमार्टम विभागात कार्यरत दोन महिला डॉक्टरांच्या जबाबांनुसार कामकाजात कोणताही दबाव नव्हता. रुग्णालयात जवळपास ५० टक्के महिला कर्मचारी कार्यरत असल्याची माहितीही देण्यात आली.
जिल्हा शल्यचिकित्सकांनी सांगितले की, पोलीस विभागाने काही अहवाल रुग्णालयाला दिले असून त्यावर समितीने चौकशी केली आहे; मात्र विभागीय चौकशी झालेली नाही.
या पार्श्वभूमीवर डॉ. गोऱ्हे यांनी सातारा जिल्हा रुग्णालयाने आपल्या अखत्यारीतील सर्व रुग्णालयांचा मागील दोन वर्षांचा विशाखा समिती अहवाल सादर करण्याचे निर्देश दिले. तपासात ढिलाई होऊ नये आणि संबंधितांना न्याय मिळावा यासाठी सर्व विभागांनी समन्वयाने काम करावे, असेही त्यांनी स्पष्ट केले. तसेच निराधार माहितीचा प्रसार टाळण्यासाठी पोलीस विभागाने अधिकृत बुलेटिनच्या माध्यमातूनच माहिती द्यावी, असेही त्या म्हणाल्या.
डॉ. गोऱ्हे यांनी विशाखा समितीच्या कार्यप्रणालीसाठी सुस्पष्ट कार्यपद्धती (SOP) तयार करण्याचे, तिमाही अहवाल विधी व न्याय विभागाला सादर करण्याचे आणि पोस्टमार्टम व प्रसूती विभागातील डॉक्टरांना ताण येऊ नये म्हणून हेल्प डेस्क स्थापन करण्याचे निर्देश दिले. पोक्सो प्रकरणातील पीडितासोबत आलेल्या नातेवाईकासाठी जेवणाची व्यवस्था करावी आणि गर्भवती महिलेच्या सोबत असलेल्या पतीला मार्गदर्शन द्यावे, असेही त्यांनी सांगितले. फलटण उपजिल्हा रुग्णालयातील परिस्थितीची सकारात्मक पडताळणी करण्याचे निर्देशही त्यांनी आरोग्य विभागाला दिले.
