रविवारी रात्रीच खासदारांना दिले दिल्लीत हजर राहण्याचे आदेश
नवी दिल्ली – महाराष्ट्राचे राज्यपाल डॉ. सी. पी. राधाकृष्णन हे उपराष्ट्रपती पदाच्या निवडणुकीत एनडीएचे उमेदवार म्हणून उभे आहेत. या पार्श्वभूमीवर एनडीएचा घटक पक्ष असलेल्या शिवसेना पक्षाच्या खासदारांची एक महत्वपूर्ण बैठक सोमवारी (८ सप्टेंबर) दुपारी १२.३० वाजता दिल्ली येथे बोलावण्यात आली आहे. ही बैठक शिवसेना पक्षप्रमुख व राज्याचे उपमुख्यमंत्री एकनाथ शिंदे यांच्या आदेशानुसार शिवसेना संसदीय गटनेते खासदार डॉ. श्रीकांत शिंदे यांच्या अध्यक्षतेखाली होणार आहे.
येत्या ९ सप्टेंबर रोजी होणाऱ्या उपराष्ट्रपती निवडणुकीत शिवसेनेने आधीच डॉ. सी. पी. राधाकृष्णन यांना पाठिंबा जाहीर केला आहे. त्यांच्या विजयासाठी शिवसेना पक्षाचे लोकसभा व राज्यसभा खासदार एकदिलाने कार्य करावेत, यासाठी ही बैठक आयोजित करण्यात आली आहे.
खासदार डॉ. श्रीकांत शिंदे यांनी रविवारी रात्रीच सर्व खासदारांना तातडीने दिल्लीत उपस्थित राहण्याचे आदेश दिले आहेत. मतदान प्रक्रियेदरम्यान कोणती काळजी घ्यायची आणि कसे मतदान करायचे, यासंदर्भातील स्पष्ट सूचना शिवसेना खासदारांना आधीच देण्यात आल्या आहेत, अशी माहिती पक्षाचे प्रवक्ते खासदार नरेश म्हस्के यांनी दिली.
