‘भाषा हा आजार नाही, ती अस्मिता आहे’ – मोहन भागवतांवर राज ठाकरेंचा प्रचंड हल्लाबोल

मुंबई: महाराष्ट्र नवनिर्माण सेनेचे अध्यक्ष Raj Thackeray यांनी राष्ट्रीय स्वयंसेवक संघाचे सरसंघचालक Mohan Bhagwat यांच्या “भाषेबद्दल आग्रही राहणे हा आजार आहे” या वक्तव्याचा तीव्र शब्दांत समाचार घेतला आहे.

राज ठाकरे म्हणाले की, भाषेवरील प्रेम हा आजार नसून ती लोकांची ओळख आणि स्वत्व आहे, आणि त्याच ओळखीवर भारताची राज्यरचना उभी आहे.

“भाषावार प्रांतरचना का झाली, याचा इतिहास भागवतांना माहीत नसेल असं आम्हाला वाटत नाही. जर भाषेचं प्रेम आजार असेल, तर हा आजार संपूर्ण देशाला आहे – तामिळनाडू, कर्नाटक, पंजाब, बंगाल, गुजरात सर्वत्र,” असे ते म्हणाले.

निवडक मौनावर सवाल

राज ठाकरेंनी Rashtriya Swayamsevak Sangh च्या दुहेरी भूमिकेवर गंभीर प्रश्न उपस्थित केले.

“गुजरातमध्ये उत्तर प्रदेश–बिहारमधील लोकांना पळवून लावण्यात आलं, तेव्हा समरसतेचे धडे द्यायला भागवत का गेले नाहीत? कर्नाटक, तामिळनाडू, पंजाब, बंगालमध्ये का गेले नाहीत?” असा सवाल त्यांनी केला.

‘भीतीमुळे गर्दी जमली’

मुंबईतील कार्यक्रमावर थेट टीका करताना ठाकरे म्हणाले “त्या कार्यक्रमाला आलेली मंडळी भागवतांवर प्रेम म्हणून नव्हती, तर नरेंद्र मोदी सरकारच्या भीतीमुळे आली होती. नाहीतर या रटाळ प्रवचनांना आजवर कोण आलं होतं?”

संघाची अप्रत्यक्ष राजकारणात उडी

संघ स्वतःला अराजकीय म्हणवतो, पण प्रत्यक्षात निवडणूक गणितं सांभाळतो, असा आरोप करत त्यांनी भय्याजी जोशींच्या मुंबईच्या भाषेविषयक विधानाचा उल्लेख केला.

“मराठी माणसाला डिवचायचं आणि गुजराती मतदारांना चोंबाळायचं — हा भाजपचा अप्रत्यक्ष फायदा पाहून केलेला प्रकार होता,” असे ठाकरे म्हणाले.

हिंदुत्वावरही प्रश्न

राज ठाकरेंनी स्पष्ट केलं की हिंदूंवर हल्ला झाला तर ते हिंदू म्हणून उभे राहतील, पण हिंदुत्वाच्या नावाखाली सुरू असलेल्या धिंगाण्यावरही त्यांनी बोट ठेवलं.

“उत्तर भारतात कावड यात्रांमध्ये महिलांना बिभत्स नाचायला लावलं जातं, बीफ एक्सपोर्टमध्ये भारत दुसऱ्या क्रमांकावर पोहोचला, आणि देशात गोहत्येचं राजकारण करून लोकांच्या माथी भडकवल्या जात आहेत – यावर भागवत कधी बोलणार?” असा सवाल त्यांनी केला.

‘मराठी माणूस अंतिम प्राधान्य’

राज ठाकरे यांनी ठामपणे सांगितले, “आमच्यासाठी मराठी भाषा आणि मराठी माणूस हेच सर्वोच्च प्राधान्य आहे. भाषिक आणि प्रांतिक अस्मिता या देशात राहणारच, महाराष्ट्रातही राहणारच. हे आमचं स्वत्व आहे — आणि ते आव्हानात टाकलं गेलं तर महाराष्ट्र पेटून उठेल.”