मुंबई – महाराष्ट्राच्या आणि मराठी भाषेच्या सांस्कृतिक जडणघडणीत मोलाचा वाटा उचललेल्या रेडिओ आणि आकाशवाणी या माध्यमातून अनेक नामवंत कलाकार, निवेदक आणि तंत्रज्ञ घडले. या योगदानाच्या गौरवासाठी सांस्कृतिक कार्य विभागातर्फे ‘महाराष्ट्र रेडिओ महोत्सव’ आयोजित करण्यात येत आहे. या महोत्सवाच्या निमित्ताने ‘महाराष्ट्रभूषण’ आशाताई भोसले यांच्या सन्मानार्थ ‘महाराष्ट्र आशा रेडिओ पुरस्कार’ दिले जाणार असल्याची घोषणा सांस्कृतिक कार्यमंत्री आशीष शेलार यांनी आज पत्रकार परिषदेत केली.
मंत्रालयातील वार्ताहर कक्षात झालेल्या या पत्रकार परिषदेत मंत्री शेलार यांनी रेडिओ माध्यमाच्या गेल्या १०२ वर्षांतील सांस्कृतिक वाटचालीचा आढावा घेतला. येत्या २१ जून रोजी यशवंतराव चव्हाण प्रतिष्ठान, मुंबई येथे मुख्यमंत्री देवेंद्र फडणवीस यांच्या हस्ते आणि सांस्कृतिक क्षेत्रातील मान्यवरांच्या उपस्थितीत हे पुरस्कार प्रदान करण्यात येणार आहेत.
या पुरस्कारांमध्ये खालील प्रकारांचा समावेश आहे:
1. आशा रेडिओ जीवनगौरव पुरस्कार
2. महाराष्ट्र आशा सर्वोत्कृष्ट रेडिओ पुरस्कार
3. महाराष्ट्र आशा कम्युनिटी रेडिओ पुरस्कार
4. महाराष्ट्र आशा सर्वोत्कृष्ट रेडिओ मनोरंजन पुरस्कार
5. महाराष्ट्र आशा सर्वोत्कृष्ट रेडिओ सांस्कृतिक पुरस्कार
6. महाराष्ट्र आशा सर्वोत्कृष्ट पुरुष निवेदक पुरस्कार
7. महाराष्ट्र आशा सर्वोत्कृष्ट महिला निवेदक पुरस्कार
8. महाराष्ट्र आशा सर्वोत्कृष्ट नवोदित निवेदक पुरस्कार
9. महाराष्ट्र आशा सर्वोत्कृष्ट मराठी निवेदक पुरस्कार
10. महाराष्ट्र आशा सर्वोत्कृष्ट सामाजिक सौहार्द पुरस्कार
11. महाराष्ट्र आशा सर्वोत्कृष्ट स्टोरीटेलरिंग पुरस्कार
12. विशेष आशा पुरस्कार
मंत्री शेलार यांनी यावेळी सांगितले की, या महोत्सवात महाराष्ट्रभूषण आशाताई भोसले यांना वैयक्तिकरित्या निमंत्रण दिले जाणार असून, त्यांच्या उपस्थितीत या महोत्सवाला विशेष उजाळा मिळेल.
