कामगार मंत्री आकाश फुंडकर यांची विधानसभेत माहिती

मुंबई: राष्ट्रीय वस्त्रोद्योग महामंडळ (NTC) अंतर्गत येणाऱ्या मुंबईतील मिल कामगारांच्या थकीत वेतनाचा प्रश्न केंद्र शासनाच्या अखत्यारीत येत असला, तरी राज्य शासन या प्रकरणात सक्रीय भूमिका घेणार असल्याची माहिती कामगार मंत्री आकाश फुंडकर यांनी विधानसभेत दिली.

विधानसभा सदस्य ज्योती गायकवाड यांनी एनटीसी मिल कामगारांना थकीत वेतन अदा करण्याबाबत प्रश्न उपस्थित केला होता. त्यास उत्तर देताना मंत्री फुंडकर म्हणाले की, कामगारांवर अन्याय होऊ नये आणि त्यांच्या थकीत वेतनासह सर्व देणी वेळेत मिळावीत यासाठी केंद्र व राज्य शासन समन्वयाने कार्यरत आहे. आवश्यकतेनुसार मंत्रालयात बैठक घेऊन या प्रकरणांवर निर्णय घेण्यात येईल.

केंद्र शासनाच्या कामगार विभागातील उप मुख्य आयुक्तांच्या स्तरावर राष्ट्रीय मिल मजदूर संघ आणि मिल व्यवस्थापन यांच्यात तडजोडीसाठी प्रयत्न सुरू असल्याचेही त्यांनी सांगितले. सुनावण्यांच्या तारखा निश्चित झाल्या असून, त्या माध्यमातून लवकरच निर्णय अपेक्षित असल्याचे मंत्री फुंडकर यांनी नमूद केले.

या चर्चेत सदस्य संजय केळकर आणि दिलीप लांडे यांनी सहभाग घेतला.