मुंबई: हृदय, फुफ्फुस, मूत्रपिंड तसेच बोन मॅरो प्रत्यारोपणासह एकूण नऊ प्रकारच्या गंभीर उपचारांसाठी साडेनऊ लाख ते २२ लाख रुपयांपर्यंत आर्थिक सहाय्य पात्र लाभार्थ्यांना देण्यात येणार असल्याची माहिती आरोग्य राज्यमंत्री Meghna Bordikar यांनी आज विधानसभेत प्रश्नोत्तराच्या तासात दिली.
या संदर्भात सदस्य Aslam Shaikh यांनी प्रश्न उपस्थित केला होता. काही रुग्णालयांत दरपत्रक स्पष्टपणे दर्शनी भागात लावले जात नसल्याने रुग्णांची हेळसांड होते आणि वेळेवर उपचार मिळत नाहीत, असा मुद्दा त्यांनी मांडला.
राज्यमंत्री बोर्डीकर यांनी स्पष्ट केले की, आयुष्मान भारत–प्रधानमंत्री जन आरोग्य योजना आणि महात्मा ज्योतिराव फुले जन आरोग्य योजना या संयुक्त योजनेअंतर्गत उपचारांच्या दरांमध्ये रक्त तपासणी, रोगनिदान, एक्स-रे, शस्त्रक्रिया तसेच रुग्ण दाखल झाल्यापासून डिस्चार्जपर्यंतचा संपूर्ण खर्च समाविष्ट आहे. मात्र, कार्डियाक लॅब खर्चाचा समावेश नाही, असे त्यांनी सांगितले.
३१ डिसेंबर २०२५ पर्यंत ६ लाख ११ हजार लाभार्थ्यांनी आयुष्मान भारत योजनेचा लाभ घेतल्याची माहिती देताना, मुंबईतील मोठ्या रुग्णालयांना या योजनेत सहभागी करण्यासाठी प्रयत्न सुरू असून, यासाठी या महिन्याच्या अखेरीस बैठक घेण्यात येणार असल्याचे त्यांनी नमूद केले.
दरपत्रक जाहीर करण्याविषयी प्रश्न उपस्थित करताना भाजप सदस्य Atul Bhatkhalkar यांनी मुंबईतील रुग्णांना अपेक्षित लाभ मिळत नसल्याचे निदर्शनास आणले. उपनगरांतील रुग्णालयांसाठी वेगळे दरपत्रक जाहीर करण्याचा विचार करणार का, असा सवालही त्यांनी केला.
