कोकणात प्रदूषणकारी उद्योगांना थारा नाही: उपमुख्यमंत्री एकनाथ शिंदे

लोटे परशुराम एमआयडीसीतील ‘मितेनी–लक्ष्मी ऑरगॅनिक’ प्रकरणावर शिंदेंची स्पष्ट भूमिका

चिपळूण: लोटे परशुराम औद्योगिक वसाहतीतील ‘मितेनी–लक्ष्मी ऑरगॅनिक’ या कंपनीबाबत सोशल मीडियावर सुरू असलेल्या चर्चांच्या पार्श्वभूमीवर उपमुख्यमंत्री Eknath Shinde यांनी कोकणातील जनतेला ठाम शब्दांत आश्वासन दिले.
कोकणच्या माती, पाणी, हवा आणि जनतेच्या आरोग्याशी तडजोड करणाऱ्या कोणत्याही उद्योगाला सरकार पाठीशी घालणार नाही, अशी स्पष्ट भूमिका त्यांनी जाहीरपणे मांडली.

चिपळूण येथे झालेल्या सभेत बोलताना शिंदे म्हणाले, “कोकणात प्रदूषण करणाऱ्या उद्योगांना कोणत्याही परिस्थितीत थारा दिला जाणार नाही. जनतेच्या आरोग्याशी खेळ होऊ देणार नाही. विकासाच्या नावाखाली लोकांचे आयुष्य धोक्यात टाकणाऱ्यांविरोधात सरकार कठोर भूमिका घेईल.”

लोटे परशुराम एमआयडीसीतील औद्योगिक प्रकल्पांबाबत गेल्या काही महिन्यांपासून सोशल मीडियावर विविध दावे आणि आरोप प्रसारित होत आहेत. याच पार्श्वभूमीवर शिंदेंनी थेट भूमिका मांडत स्पष्ट केले की, कोणताही उद्योग लोकांच्या आरोग्यास, पर्यावरणास किंवा निसर्गाला धोका ठरत असल्याचे आढळल्यास त्याला सरकारकडून संरक्षण दिले जाणार नाही.

कोकण हा केवळ औद्योगिक पट्टा नाही, तर जैवविविधता, शेती, मत्स्यव्यवसाय आणि पर्यटनाचा आधार असल्याचे नमूद करत शिंदेंनी सांगितले की, “कोकणचा विकास हा पर्यावरणाशी सुसंगत आणि जनहिताचा असलाच पाहिजे.”

उपमुख्यमंत्र्यांच्या या स्पष्ट भूमिकेमुळे लोटे परशुराम एमआयडीसीतील उद्योगांबाबत निर्माण झालेल्या संभ्रमावर मोठ्या प्रमाणात पडदा पडल्याचे मानले जात आहे. सरकार जनतेच्या बाजूने ठामपणे उभे असल्याचा संदेश या वक्तव्यातून दिला गेला आहे.