मुंबई : मोबाईल सेवा पुरवठादार वोडाफोन कंपनीने ग्राहक सेवा देताना मराठी भाषेचा वापर करावा, तसेच मराठी भाषिक तरुणांना रोजगाराच्या संधी मिळाव्यात, यासाठी शिवसेना (ठाकरे गट)च्या शिवसंचार सेनेकडून वोडाफोन कंपनीला निवेदन देण्यात आले.
शिवसंचार सेनेचे अध्यक्ष अखिल चित्रे यांनी वोडाफोन कंपनीचे नोडल हेड श्री. दास यांची भेट घेऊन त्यांना हे निवेदन दिले. त्यात मराठीतून हेल्पलाइन सेवा सुरु करावी आणि मराठी भाषिक कर्मचाऱ्यांची नियुक्ती करावी, अशी मागणी करण्यात आली आहे.
यापूर्वी काही दिवसांपूर्वी एअरटेल कंपनीच्या कर्मचाऱ्यांनी मराठीत संवाद साधण्यास नकार दिल्याने वाद निर्माण झाला होता. त्यानंतर ठाकरे गटाने आंदोलनाचा इशारा दिला होता. त्यानंतर एअरटेल कंपनीने दिलगिरी व्यक्त करत मराठीतून ग्राहक सेवा देणारी हेल्पलाइन सुरु केली होती.
वोडाफोन कंपनीनेही तत्काळ मराठी भाषिक ग्राहकांसाठी स्वतंत्र हेल्पलाइन सुरु करावी, अशी आग्रही मागणी शिवसंचार सेनेने केली आहे. यामुळे मराठी तरुणांना रोजगार मिळेल आणि ग्राहकांना मातृभाषेत संवाद करता येईल, असे अखिल चित्रे यांनी सांगितले.
