मुंबई : आंतरराष्ट्रीय विद्यार्थ्यांना प्रवेश अर्ज, दस्तऐवज साक्षांकितीकरण, शुल्क प्रक्रिया आणि इतर शैक्षणिक कागदपत्रे एकाच ठिकाणी सादर करता यावीत, यासाठी “एक खिडकी प्रणाली” (Single Window System) अधिक सुलभ व पारदर्शक असावी, असे निर्देश उच्च व तंत्र शिक्षण मंत्री चंद्रकांतदादा पाटील यांनी दिले.
आज मंत्रालयात एनआरआय (NRI), पीआयओ (PIO), ओसीआय (OCI) आणि आंतरराष्ट्रीय विद्यार्थ्यांसाठी प्रवेश प्रक्रियेत सुधारणा करण्यासाठी “एक खिडकी प्रणाली” लागू करण्याबाबत मंत्री चंद्रकांतदादा पाटील यांच्या अध्यक्षतेखाली बैठक झाली.
यावेळी तंत्रशिक्षण विभागाचे अपर मुख्य सचिव बी. वेणुगोपाल रेड्डी, तंत्रशिक्षण विभागाचे संचालक डॉ. विनोद मोहितकर, उच्च शिक्षण संचालक डॉ. शैलेंद्र देवळाणकर, राज्य सामाईक परीक्षा कक्षाचे आयुक्त दिलीप सरदेसाई आणि अन्य संबंधित अधिकारी उपस्थित होते.
विद्यापीठे आणि महाविद्यालयांचा समावेश करून प्रणाली प्रभावी करावी
बैठकीत या प्रणालीच्या अंमलबजावणी दरम्यान येणाऱ्या अडचणी, तांत्रिक बाबी आणि त्यावर उपाययोजना याबाबत सखोल चर्चा करण्यात आली.
मंत्री चंद्रकांतदादा पाटील म्हणाले, की “एक खिडकी प्रणालीमध्ये राज्यातील विद्यापीठे आणि महाविद्यालयांचा अधिकाधिक समावेश करावा. त्यामुळे विदेशातून येणाऱ्या विद्यार्थ्यांसाठी महाराष्ट्रात प्रवेश घेण्याची उत्तम संधी निर्माण होईल. या प्रणालीमुळे प्रवेश प्रक्रिया अधिक सुलभ व सुधारित होईल आणि महाराष्ट्रातील उच्च शिक्षण क्षेत्राला आंतरराष्ट्रीय स्तरावर वेगळी ओळख मिळेल. त्यामुळे ही प्रणाली अधिक व्यापक आणि प्रभावी करण्यासाठी आवश्यक सुधारणा कराव्यात.”
