मुंबई — महाराष्ट्रातील खेळाडूंना प्रोत्साहन देण्यासाठी आणि त्यांच्या आरोग्याची सुरक्षितता सुनिश्चित करण्यासाठी राष्ट्रीय व आंतरराष्ट्रीय स्पर्धांमध्ये सहभागी होणाऱ्या राज्यातील क्रीडापटूंना वैद्यकीय विमा कवच उपलब्ध करून देण्यासाठी क्रीडा विभागाने तातडीने प्रस्ताव तयार करून सादर करावा, असे स्पष्ट निर्देश उपमुख्यमंत्री अजित पवार यांनी आज दिले.
मंत्रालयातील समिती कक्षात पवार यांच्या अध्यक्षतेखाली क्रीडा विभागाच्या योजनांचा आढावा घेण्यात आला. उपमुख्यमंत्री पवार म्हणाले की, क्रीडा क्षेत्राच्या सर्वांगीण विकासासाठी शासनाच्या विविध विभागांच्या ताब्यात असलेली खेळांची मैदाने क्रीडा विभागाकडे वर्ग करण्याचा प्रस्ताव तयार करून तो मंत्रिमंडळासमोर मांडावा. शिवछत्रपती राज्य क्रीडा पुरस्कारासाठी प्रावीण्य प्राप्त खेळाडू व संघटनांचा समावेश करण्यासाठी शासन निर्णयात सुधारणा कराव्यात, तसेच ऑलिम्पिक असोसिएशन आणि मान्यताप्राप्त संघटनांचे प्रतिनिधी शासनाच्या निर्णय प्रक्रियेत सहभागी व्हावेत.
राज्यातील प्रतिभावान खेळाडूंना राष्ट्रीय व आंतरराष्ट्रीय स्तरावर अधिक चांगली कामगिरी करता यावी यासाठी आवश्यक निधी, अत्याधुनिक साहित्य आणि मार्गदर्शक उपलब्ध करून देण्यात शासन कसूर करणार नाही, असेही त्यांनी स्पष्ट केले.
“महाराष्ट्राला क्रीडा क्षेत्रात आघाडीवर ठेवण्यासाठी सर्वसमावेशक धोरण आवश्यक आहे. त्याचबरोबर ‘मिशन लक्षवेध’ योजना अधिक प्रभावीपणे राबवली जाईल,” असे उपमुख्यमंत्री अजित पवार यांनी बैठकीत स्पष्ट केले.