नाशिक – महाराष्ट्र आरोग्य विज्ञान विद्यापीठाच्या ‘चक्र’ (Centre for Health, Applied Knowledge & Research Autonomy) या उत्कृष्टता केंद्राच्या प्रकल्पाचे भूमिपूजन आणि उद्घाटन रविवार, 1 जून 2025 रोजी राज्याचे मुख्यमंत्री देवेंद्र फडणवीस यांच्या हस्ते नाशिक येथे होणार आहे.
विद्यापीठाच्या कुलगुरू लेफ्टनन्ट जनरल माधुरी कानिटकर (निवृत्त) यांनी याबाबत माहिती देताना सांगितले की, राज्यातील वैद्यकीय शिक्षण आणि संशोधन क्षेत्रात दर्जात्मक सुधारणा घडवून आणण्याच्या उद्देशाने विद्यापीठात ‘चक्र’ या उत्कृष्टता केंद्राची स्थापना केली जात आहे. हा प्रकल्प हब अँड स्पोक या कार्यपद्धतीवर आधारित असून, तो राज्यभर वैद्यकीय शिक्षण आणि संशोधनाला एकत्रित दिशा देणारा ठरेल.
या उद्घाटन सोहळ्यास खालील मान्यवर उपस्थित राहणार आहेत: आरोग्य विज्ञान विद्यापीठाचे प्रति-कुलगुरू आणि वैद्यकीय शिक्षण मंत्री हसन मुश्रीफ, अन्न, नागरी पुरवठा आणि ग्राहक संरक्षण मंत्री छगन भुजबळ, जलसंपदा, तापी व कोकण विकास, आपत्ती व्यवस्थापन मंत्री गिरीश महाजन, शालेय शिक्षण मंत्री दादाजी भुसे, कृषी मंत्री अ‍ॅड. माणिकराव कोकाटे, अन्न व औषध प्रशासन मंत्री नरहरी झिरवळ, नगरविकास, परिवहन, सामाजिक न्याय आणि वैद्यकीय शिक्षण राज्यमंत्री माधुरी मिसाळ, वैद्यकीय शिक्षण व औषधी द्रव्ये विभागाचे मंत्री धिरज कुमार आणि वैद्यकीय शिक्षण संचालनालयाचे आयुक्त राजीव निवतकर.
हा उद्घाटन समारंभ विद्यापीठाच्या परिसरातील शिक्षक प्रशिक्षण प्रबोधिनीच्या धन्वंतरी सभागृहात दुपारी 3 वाजता आयोजित करण्यात आला आहे. या कार्यक्रमाला खासदार, आमदार, लोकप्रतिनिधी तसेच विविध क्षेत्रांतील मान्यवर उपस्थित राहणार आहेत.
