गोकुळ दूध संघाचे माजी अध्यक्ष विश्वासराव पाटील यांचा शिवसेनेत जाहीर प्रवेश
ठाणे : कोल्हापूरमधील गोकुळ दूध संघाचे माजी अध्यक्ष व विद्यमान संचालक विश्वासराव आबाजी पाटील यांनी आज उपमुख्यमंत्री एकनाथ शिंदे यांच्या उपस्थितीत काँग्रेस पक्षातील आपल्या असंख्य समर्थकांसह शिवसेनेत जाहीर प्रवेश केला. या पक्षप्रवेशामुळे कोल्हापूर जिल्ह्यात शिवसेनेची ताकद अधिक वाढल्याचे राजकीय वर्तुळात बोलले जात आहे. सदरचा कार्यक्रम उपमुख्यमंत्री शिंदे यांच्या ठाणे येथील निवासस्थानी पार पडला.
यावेळी उपमुख्यमंत्री एकनाथ शिंदे यांनी विश्वासराव पाटील आणि त्यांच्या सर्व सहकाऱ्यांचे शिवसेनेत स्वागत करत भावी वाटचालीसाठी शुभेच्छा दिल्या. विश्वासराव पाटील यांचा सहकार क्षेत्रातील तसेच पक्ष संघटनात्मक कामाचा प्रदीर्घ अनुभव शिवसेनेसाठी मार्गदर्शक ठरेल, असा विश्वासही त्यांनी व्यक्त केला. या पक्षप्रवेशात शिरोली दुमला गावचे सरपंच सचिन पाटील, हनुमान दूध संघ महेचे अध्यक्ष बुद्धिराज शंकर पाटील महेकर, यशवंत सहकारी बँक कुडित्रेचे संचालक नंदकुमार अण्णासाहेब पाटील, तसेच अनिल सोलापूरे, राहुल पाटील, एस. के. पाटील, माधव पाटील, सुनील पाटील यांच्यासह अनेक पदाधिकारी व कार्यकर्त्यांचा समावेश होता.
कार्यक्रमाला करवीर विधानसभा मतदारसंघाचे आमदार चंद्रदीप नरके हेही उपस्थित होते. या पक्षप्रवेशामुळे आगामी स्थानिक व विधानसभा राजकारणात शिवसेनेची भूमिका अधिक मजबूत होणार असल्याचे संकेत मिळत आहेत.
