सुजात व प्रकाश आंबेडकरांकडून सरकारला जाब विचारण्याची मागणी
मुंबई : एपस्टिन फाइल्स आणि अमेरिकेशी सुरू असलेल्या कथित ‘एकतर्फी’ व्यापार धोरणाच्या पार्श्वभूमीवर सोमवारी छत्रपती शिवाजी महाराज टर्मिनस (CSMT) परिसरात वंचित बहुजन आघाडीच्या वतीने महाआंदोलन करण्यात आले. आंदोलनादरम्यान युवा नेते सुजात आंबेडकर आणि राष्ट्रीय अध्यक्ष ॲड. प्रकाश आंबेडकर यांनी केंद्र सरकारकडून स्पष्टीकरण व पारदर्शक चौकशीची मागणी केली.
आंतरराष्ट्रीय स्तरावर चर्चेत असलेल्या Jeffrey Epstein प्रकरणाच्या संदर्भात सुजात आंबेडकर यांनी पंतप्रधान नरेंद्र मोदी यांच्याविषयी आरोप करत सरकारने स्पष्ट भूमिका जाहीर करावी, असे म्हटले. “जनतेने आणि माध्यमांनी सरकारला प्रश्न विचारावेत,” अशी त्यांची मागणी होती. महिलांच्या सुरक्षिततेच्या प्रश्नाकडे लक्ष वेधत त्यांनी पारदर्शकतेवर भर दिला.
महाआंदोलनाचे नेतृत्व करताना ॲड. प्रकाश आंबेडकर यांनी अमेरिकेसोबतच्या व्यापार करारावर टीका केली. “हा करार देशहिताविरोधी आहे,” असा दावा करत त्यांनी आर्थिक हितसंबंध, परराष्ट्र धोरण आणि आरएसएस-इस्राईल संबंधांवरही प्रश्न उपस्थित केले. एपस्टिन फाइल्समध्ये पंतप्रधानांच्या नावाचा कथित उल्लेख झाल्याचा दावा करत त्यांनी चौकशीची मागणी केली.
आंदोलनादरम्यान “मोदी हटाव, देश बचाव” अशा घोषणाबाजी करण्यात आली. मातंग मुक्ती सेनेसह विविध सामाजिक संघटनांनी आंदोलनाला पाठिंबा दिला. आखाती देशांमध्ये कार्यरत भारतीयांच्या सुरक्षेबाबत चिंता व्यक्त करत, आंतरराष्ट्रीय तणाव वाढल्यास त्याचे परिणाम गंभीर ठरू शकतात, असे आंबेडकर म्हणाले.
सीएसएमटी परिसरात मोठा पोलीस बंदोबस्त तैनात करण्यात आला होता. मुंबईसह उपनगरांतून मोठ्या संख्येने कार्यकर्ते सहभागी झाले. या आंदोलनामुळे काही काळ परिसरात गर्दी झाली. केंद्र सरकारकडून अद्याप अधिकृत प्रतिक्रिया आलेली नाही.
