By Milind Mane
Twitter : @milindmane70
महाड: संपूर्ण महाडला बुधवारी वादळीवारा आणि विजेच्या कडकडाटासह आलेल्या पावसाने झोडपून काढले. भात कापणी सुरू असल्याने कापलेले भात पाण्यामध्ये भिजले आहेत. या पावसामुळे शेतकरी अडचणीत आला आहे.
हवामान खात्याने अवकाळी पावसाचा अंदाज व्यक्त केला होता. त्याप्रमाणे बुधवारी अचानक संपूर्ण महाड परिसरात वादळी वाऱ्यासह अवकाळी पावसाने हजेरी लावली. या पावसामुळे संपूर्ण परिसरातील जणजीवन विस्कळीत झाले. तयार झालेल्या भात शेतीची कापणी सुरू आहे. तर अनेक शेतकऱ्यांनी कापणी करून भाऱ्यांची शेतातच उडवी रचली आहेत. अचानक आलेल्या अवकाळी पावसामुळे मोठ्या प्रमाणात शेतामध्ये पाणी तुंबून राहिले आणि कापणी केलेल्या भात पिकावर पाणी फिरले. रचून ठेवलेले भारे देखील भिजल्याने शेतकरी अडचणीत आला आहे. यावर्षी झालेल्या समाधानकारक पावसामुळे भात शेती देखील चांगली आली होती.
महाड शहर व तालुक्यात मात्र या अवकाळी पावसामुळे तोंडाशी आलेला घास निघून जातो की काय अशी चिंता शेतकऱ्याला वाटू लागली आहे. या पावसामुळे भात पीक भिजल्याने या पिकाचे नुकसान होणार आहे.
ज्या शेतकऱ्यांचे दिनांक 08/11/2023 च्या पावसामुळे भात पिकाचे काढणीपश्चात नुकसान झाले असेल, अशा भात पिक विमा काढलेल्या शेतकऱ्यांनी ज्या सर्वे नंबर मधील भात पिकाचे नुकसान झाले आहे, त्या सर्वे नंबरची नुकसानीची तक्रार कृषि विमा कंपनीला देणे किंवा चोलामंडलम एम एस इन्शुरन्स कंपनीच्या टोल फ्री क्रमांक 18002089200 वर तक्रार 72 तासांच्या आत देणे अनिवार्य राहील, असे कृषी विभागाने कळवले आहे. याबाबत चोलामंडलम पिक विमा कार्यालय महाड (नवेनगर) धारिया – मो. नं. 7709762007 तर अधिक माहितीसाठी संपर्क-विठ्ठल पवार तालुका विमा प्रतिनिधी -8793400835 यांच्याशी संपर्क साधावा असे असवहान करण्यात आले आहे.
