मुंबई
भाजप आमदार गणपत गायकवाड यांनी शिंदे गटाचे कल्याण शहरप्रमुख महेश गायकवाड यांच्यावर ६ गोळ्या झाडल्यानंतर राज्यभरात याचे पडसाद उमटले. महेश गायकवाड यांना ठाण्यातील ज्युपिटर रुग्णालयात दाखल करण्यात आलं असून त्यांच्या शरीरातील सहा गोळ्या बाहेर काढण्यात डॉक्टरांना यश आलं आहे.
गायकवाड यांची विचारपूस करण्यासाठी मुख्यमंत्री एकनाथ शिंदे रुग्णालयात पोहोचले आहेत. झालेली घटना ही अत्यंत दुर्दैवी आहे. या घटनेतून बचावलेल्या महेश गायकवाड (Mahesh Gaikwad) यांनी लवकरात लवकर पूर्ण बरे व्हावे, अशी भावना मुख्यमंत्री शिंदे यांनी व्यक्त केली. महेश गायकवाड यांची प्रकृती चिंताजनक असल्याचं पत्र रुग्णालय प्रशासनाने काढले आहे. दरम्यान गृहमंत्री देवेंद्र फडणवीस यांनीही चौकशीचे आदेश दिले आहेत.
मुख्यमंत्री एकनाथ शिंदे यांनी ठाण्यातील ज्युपिटर हॉस्पिटलमध्ये जाऊन कल्याण पूर्व विभागातील माजी नगरसेवक महेश गायकवाड यांच्या प्रकृतीची विचारपूस केली. यावेळी काल घडलेल्या घटनेची त्यांनी पोलिसांकडून सविस्तर माहिती जाणून घेतली तसेच गायकवाड यांच्यावर सुरू असलेल्या उपचारांबद्दल डॉक्टरांशी चर्चा केली. या घटनेतून बचावलेल्या गायकवाड यांनी लवकरात लवकर पूर्ण बरे व्हावे अशी भावना मुख्यमंत्री शिंदे यांनी यावेळी व्यक्त केली.
