मुंबई: विनोद कांबळी यांच्या उपचारासाठी डॉ. श्रीकांत शिंदे फाउंडेशनकडून ५ लाख रुपयांची मदत जाहीर
भारतीय क्रिकेट संघाचा माजी आक्रमक फलंदाज विनोद कांबळी यांना प्रकृतीच्या कारणास्तव ठाणे (भिवंडी) येथील आकृती हॉस्पिटलमध्ये दाखल करण्यात आले आहे. उपमुख्यमंत्री एकनाथ शिंदे यांच्या आदेशानुसार त्यांचे ओएसडी मंगेश चिवटे यांनी हॉस्पिटलमध्ये जाऊन कांबळी यांची आस्थेवाईकपणे विचारपूस केली. तसेच हॉस्पिटलच्या डॉक्टरांशी चर्चा करून उपचारात कोणतीही अडचण येणार नाही याची काळजी घेण्याची सूचना दिली.
क्रिकेटपटू विनोद कांबळी यांची सध्याची परिस्थिती पाहता कल्याण लोकसभा मतदार संघाचे खासदार डॉ. श्रीकांत शिंदे यांनी कांबळी यांना वैयक्तिक ५ लाख रुपयांची मदत जाहीर केली आहे. डॉ. श्रीकांत शिंदे फाउंडेशनच्या माध्यमातून पुढील आठवड्यात ही मदत करण्यात येणार आहे. तसेच आणखी मदतीचे आश्वासन खासदार डॉ. श्रीकांत शिंदे यांनी दिले असल्याचे ओएसडी मंगेश चिवटे यांनी सांगितले.
माजी मुख्यमंत्री आणि विद्यमान उपमुख्यमंत्री एकनाथ शिंदे यांच्या मदतीबद्दल क्रिकेटपटू विनोद कांबळी यांनी कृतज्ञता व्यक्त केली आहे. कांबळी यांनी हॉस्पिटलमध्ये भेटण्याची विनंती केली असून, लवकरच उपमुख्यमंत्री एकनाथ शिंदे आणि खासदार डॉ. श्रीकांत शिंदे कांबळी यांची भेट घेऊन पुढील मदत करणार आहेत.
