मुंबई : मुख्यमंत्री ‘लाडकी बहीण’ योजनेचा एप्रिल महिन्याचा हप्ता येत्या ३० एप्रिल रोजी, अक्षय तृतीयाच्या शुभमुहूर्तावर, लाभार्थी महिलांच्या बँक खात्यात थेट जमा केला जाणार असल्याची माहिती महिला व बालविकास मंत्री आदिती तटकरे यांनी आज पत्रकार परिषदेत दिली.
मंत्री तटकरे म्हणाल्या, “या योजनेअंतर्गत पात्र महिलांना दरमहा ₹1,500 रुपये थेट DBT पद्धतीने दिले जात आहेत. ही योजना महिलांच्या आर्थिक स्वातंत्र्याला बळकटी देते तसेच आरोग्य व पोषणासाठीही उपयुक्त ठरते.”
त्यांनी सांगितले की, 2.52 कोटी महिलांनी या योजनेसाठी नोंदणी केली असून, जानेवारी व फेब्रुवारीचे हप्ते मार्च महिन्यात वितरित करण्यात आले. एप्रिल हप्ता वेळेवर मिळावा यासाठी प्रशासनाने बँकांशी समन्वय साधला आहे.
अक्षय तृतीया हा सण समृद्धीचे प्रतीक मानला जातो. त्यामुळे या दिवशी हप्ता जमा होणे लाभार्थींना आर्थिकदृष्ट्या दिलासा देणारे ठरेल, असे मंत्री तटकरे म्हणाल्या.
दरम्यान, योजनेला मिळणाऱ्या उत्स्फूर्त प्रतिसादामुळे आगामी काळात हप्ता ₹2,100 रुपये करण्याचा विचार सरकार करत असल्याचे संकेतही देण्यात आले, मात्र यावर अद्याप अंतिम निर्णय झालेला नाही.
बँक खात्याची खात्री करा – प्रशासनाचा सल्ला
योजनेचा लाभ वेळेवर मिळावा यासाठी लाभार्थ्यांनी आपली आधार संलग्न बँक खाती तपासून घेण्याचे आवाहन महिला व बालविकास विभागातील अधिकाऱ्यांनी केले आहे.
