महाड : महाड–दापोली राज्य मार्गावर शिरगाव गावच्या हद्दीत अवघड वळणावर व्हॅगनार कार आणि रिक्षा यांच्यात झालेल्या अपघातात पाच जण जखमी झाले आहेत. जखमींना तातडीने महाड ग्रामीण रुग्णालयात दाखल करण्यात आले असून त्यांच्यावर उपचार सुरू आहेत.
ही घटना शिरगाव हद्दीतील अवघड वळणावर घडली. MH-06-AZ-8240 क्रमांकाची व्हॅगनार कार दापोलीकडून महाडकडे येत होती, तर MH-12-SK-4998 क्रमांकाची रिक्षा महाडकडून आंबिवलीकडे जात असताना दोन्ही वाहनांची समोरासमोर धडक झाली. धडकेनंतर दोन्ही वाहने रस्त्याच्या कडेला जाऊन आदळली.
या अपघातात रिक्षातून प्रवास करणारे मनीष सचिन वाजे (रा. आंबिवली, ता. महाड) आणि रुचिता गायकर (रा. आंबिवली) हे दोघे जखमी झाले. तर व्हॅगनार कारमधील अमोल रमेश पवार (रा. महाड), रमेश बाबू पवार (रा. महाड) आणि नागेंद्र नागदेव प्रसाद (रा. करंजखोल, महाड) असे तिघे जखमी झाले आहेत.
जखमींना उपचारासाठी महाड ग्रामीण रुग्णालयात दाखल करण्यात आले असून महाड शहर पोलीस स्टेशन या घटनेचा अधिक तपास करीत आहे.
