महाड – महाड फाळकेवाडी बसला ताम्हणे गावाजवळ निसरड्या रस्त्यामुळे झालेल्या अपघातात दोन महिला प्रवासी किरकोळ जखमी झाल्या. जखमींना विन्हेरे प्राथमिक आरोग्य केंद्रात उपचार करून घरी सोडण्यात आले.
महाड आगारातून सुटलेली फाळकेवाडी बस (क्र. MH-20-BL-3074) दुपारी तीनच्या सुमारास महाडकडे येत असताना टायर रस्त्याच्या कडेला खचल्याने हा अपघात झाला. जखमींमध्ये महाड पंचायत समितीचे माजी सभापती सत्यवान कदम यांच्या पत्नी आणि बागअळी, विन्हेरे येथील शरद नाना सकपाळ यांच्या पत्नीचा समावेश असून त्यांना दोन टाके पडले.
सुदैवाने मोठा अनर्थ टळला असला तरी हा रस्ता एसटी वाहतुकीस धोकादायक झाल्याचे स्पष्ट झाले आहे. बस दरीकडे गेली असती तर मोठी दुर्घटना घडली असती, असे ग्रामस्थांनी सांगितले. जिल्हा परिषदेच्या बांधकाम विभागाने तातडीने या रस्त्याची दुरुस्ती करावी, अशी मागणी ग्रामस्थांकडून करण्यात आली आहे.
