मुंबई – राज्यात २०१२ पासून गुटखा, पान मसाला आणि सुगंधित सुपारीच्या विक्रीवर बंदी असतानाही या वस्तू खुलेआम विकल्या जात असल्याचा मुद्दा आज विधानसभेत सत्ताधाऱ्यांकडूनच ऐरणीवर आला. प्रसिद्ध बॉलिवूड अभिनेते अशा उत्पादनांच्या जाहिराती करून युवापिढीला व्यसनाधीन करत असल्याचेही यावेळी अधोरेखित करण्यात आले.
मनोज घोरपडे, श्वेता महाले आणि विक्रम पाचपुते यांनी नियम क्रमांक 105 अंतर्गत यासंदर्भात लक्षवेधी सूचना मांडली होती. चर्चेदरम्यान चिखलीच्या भाजप आमदार श्वेता महाले यांनी छत्रपती संभाजीनगरच्या अन्न व औषध प्रशासन विभागाच्या सहआयुक्तांनी पोलिसांकडून जप्त गुटखा तपासणीसाठी न पाठवण्याचे आदेश दिल्याचा गंभीर आरोप करत, संबंधित अधिकाऱ्याच्या निलंबनाची मागणी केली.
विक्रम पाचपुते, रमेश बोरनारे, महेश घोरपडे व कृष्णा खोपडे यांनी राज्यात गुटखा विक्री सर्रास सुरू असून एफडीए निष्क्रिय असल्याचे सांगितले. छत्रपती संभाजीनगरमधील मेडिकल कॉलेजजवळील पानटपऱ्यांवर ड्रग्ज व नशेचे इंजेक्शन खुलेआम विकले जात असल्याचा धक्कादायक खुलासा नारायण कुचे यांनी केला.
उत्तर देताना अन्न व औषध प्रशासन मंत्री नरहरी झिरवाळ यांनी एफडीएकडे मनुष्यबळ व निधीची कमतरता असल्याने अडचणी येत असल्याचे मान्य केले. “अधिकाऱ्यांचे निलंबन करणार, पण आधी अभ्यास करावा लागेल,” असे ते म्हणाले. छत्रपती संभाजीनगरमध्ये पोलिसांच्या मदतीने ३४ कारवाया केल्याचेही त्यांनी सांगितले.
राज्यात फक्त तीनच टेस्टिंग लॅब्स असल्यामुळे काही नमुने तपासणीसाठी न पाठवण्याचे निर्देश दिल्याचेही त्यांनी स्पष्ट केले. ३२१ कर्मचाऱ्यांची भरती एमपीएससीमार्फत झाली असून, लवकरच मनुष्यबळ उपलब्ध होईल, असे आश्वासनही त्यांनी दिले.
मात्र मंत्री झिरवाळ यांचे उत्तर समाधानकारक नसल्याचे मत श्वेता महाले, पाचपुते व घोरपडे यांनी व्यक्त केले. त्यांनी मागणी केली की, १८ डिसेंबर २०२४ रोजी दिलेले शासनविरोधी परिपत्रक काढणाऱ्या अधिकाऱ्यांवर कारवाई झाली पाहिजे.
सुगंधीत सुपारी व पान मसाल्याच्या जाहिरात करणाऱ्या बॉलिवूड कलाकारांवर कारवाईचा अधिकार एफडीएला आहे का, असा प्रश्नही उपस्थित करण्यात आला. त्यावर झिरवाळ यांनी कारवाईचा विचार करणार असल्याचे सांगत विभागात लक्ष ठेवण्याचे आणि मनुष्यबळ वाढवण्याचे आश्वासन दिले.
