सुट्टीच्या दिवशी चित्तदरवाजा परिसरात वाहनांची गर्दी; पाचाड पोलिसांकडून नियमित बंदोबस्ताची मागणी
महाड: किल्ले रायगडावर सुट्टीच्या दिवशी होणाऱ्या पर्यटक आणि शिवभक्तांच्या मोठ्या गर्दीमुळे पायथ्याशी वाहनांच्या बेशिस्त पार्किंगची समस्या गंभीर होत असून त्याचा फटका स्थानिक ग्रामस्थ आणि एसटी प्रवाशांना बसत आहे. चित्तदरवाजा परिसरात रस्त्याच्या दोन्ही बाजूंना वाहने उभी केली जात असल्याने निजामपूर, सादोशी आणि रायगडवाडीच्या दिशेने जाणाऱ्या एसटी बसेसना मार्ग काढताना मोठी अडचण निर्माण होत असल्याची तक्रार ग्रामस्थांनी केली आहे.
किल्ले रायगडावर राज्याच्या विविध भागांतून तसेच देश-विदेशातून पर्यटक आणि शिवभक्त येत असतात. काही पर्यटक हिरकणीवाडी येथून रोपवेने गडावर जातात, तर अनेकजण चित्तदरवाजामार्गे पायी चढाई करतात.
अरुंद रस्त्यावर दोन्ही बाजूंना पार्किंग
वाय सेक्शनपासून चित्तदरवाजापर्यंतचा रस्ता तुलनेने अरुंद आहे. काही ठिकाणी दोन वाहने एकाच वेळी जाण्यासाठीही मर्यादित जागा असल्याने सुट्टीच्या दिवशी परिस्थिती अधिकच बिकट होते. चित्तदरवाजा ते रायगडवाडी आणि नाणेदरवाजा परिसरात पर्यटकांकडून वाहनांचे अनियोजित पार्किंग केले जात असल्याने एसटी बसेस तसेच स्थानिक वाहनांच्या वाहतुकीवर परिणाम होत असल्याचे ग्रामस्थांचे म्हणणे आहे.
प्रवाशांना पायी जावे लागल्याची तक्रार
सुट्टीच्या दिवशी पर्यटकांची मोठी गर्दी झाल्यानंतर महाडहून निजामपूरच्या दिशेने जाणाऱ्या एसटी बसला पुढे जाण्यास अडचण निर्माण झाली. त्यामुळे काही प्रवाशांना चित्तदरवाजा परिसरात उतरून पुढील गावांकडे पायी जावे लागल्याची माहिती स्थानिकांनी दिली. ग्रामस्थांच्या म्हणण्यानुसार अशा प्रसंगी प्रवाशांना 5 ते 6 किलोमीटरपर्यंत पायपीट करावी लागते. ज्येष्ठ नागरिक, महिला, विद्यार्थी तसेच दैनंदिन प्रवास करणाऱ्या ग्रामस्थांना या परिस्थितीचा विशेष त्रास सहन करावा लागत असल्याने सुट्टीच्या दिवशी वाहतूक व्यवस्थापनासाठी ठोस नियोजन करण्याची मागणी होत आहे.
सुट्टीच्या दिवशी पोलिस बंदोबस्ताची मागणी
रायगडावर शनिवार, रविवार आणि सार्वजनिक सुट्ट्यांच्या दिवशी पर्यटकांची संख्या मोठ्या प्रमाणावर वाढते. त्यामुळे चित्तदरवाजा आणि आसपासच्या परिसरात सकाळपासूनच पोलिस किंवा वाहतूक नियमनासाठी स्वतंत्र कर्मचारी तैनात करावेत, अशी मागणी स्थानिकांनी केली आहे. पाचाड पोलिस चौकीमार्फत नियमित वाहतूक नियंत्रण, निश्चित पार्किंग क्षेत्र आणि रस्त्याच्या दोन्ही बाजूंना होणाऱ्या अनियोजित पार्किंगवर कारवाई केली तर एसटी तसेच स्थानिक वाहतूक सुरळीत होऊ शकते, असे ग्रामस्थांचे म्हणणे आहे.
रायगडसारख्या ऐतिहासिक आणि पर्यटनदृष्ट्या महत्त्वाच्या ठिकाणी वाढत्या पर्यटक संख्येबरोबर पार्किंग आणि स्थानिक वाहतुकीचे नियोजनही तितकेच महत्त्वाचे ठरत आहे.
