गंगटोक/मुंबई : रिपब्लिकन पक्षाची सिक्कीम राज्यात स्थापना झाल्याची घोषणा पक्षाचे राष्ट्रीय अध्यक्ष आणि केंद्रीय सामाजिक न्याय राज्यमंत्री ना. रामदास आठवले यांनी आज केली. रँग्पो शहरात आयोजित कार्यकर्ता मेळाव्यात त्यांनी ही माहिती दिली.
या मेळाव्यात सिक्कीम राज्य कार्यकारिणीची अधिकृत घोषणा करण्यात आली. नामग्याल भोतिया यांची सिक्कीम राज्य अध्यक्ष म्हणून, तर हरिप्रसाद बुरुम यांची राज्य सरचिटणीस म्हणून नियुक्ती करण्यात आली. या वेळी पक्षाचे ईशान्य भारत प्रभारी विनोद निकाळजे, राष्ट्रीय सचिव महेश्वर थानांजॉम, विजय बोरा यांच्यासह अनेक मान्यवर उपस्थित होते.
ना. आठवले म्हणाले, “डॉ. बाबासाहेब आंबेडकरांच्या विचारांचे अधिष्ठान असलेल्या रिपब्लिकन पक्षाला सिक्कीमच्या गावागावात पोहोचवा.” ते पुढे म्हणाले की, “राज्याच्या विकासासाठी आणि येथील जनतेला न्याय देण्यासाठी रिपब्लिकन पक्ष कार्यरत राहील. भारत सरकारकडून सिक्कीमच्या प्रश्नांकडे विशेष लक्ष दिले जाईल.”
नामग्याल भोतिया हे नामवंत समाजसेवक असून त्यांनी बौद्ध तत्त्वज्ञानावर पीएच.डी. केली आहे. त्यांच्या नेतृत्त्वाखाली पक्ष बळकट होईल, असा विश्वास ना. आठवले यांनी व्यक्त केला.
ईशान्य भारताच्या विकासाला प्राधान्य देण्याचे पंतप्रधान नरेंद्र मोदी यांनी निर्देश दिले असून, सर्व केंद्रीय मंत्र्यांनी तेथील दौरे करण्याचे आदेशही त्यांनी दिल्याची माहिती ना. आठवले यांनी यावेळी दिली.
