X: @therajkaran
नागपूर: मुंबईतील मार्च १९९३ बाँबस्फोटातील पॅरोलवरील प्रमुख आरोपी सलीम कुत्तासोबत शिवसेना उद्धव ठाकरे गटाचा नाशिक महानगरप्रमुख सुधाकर बडगुजर याने केलेल्या पार्टी प्रकरणाची एसआयटी मार्फत चौकशी केली जाईल, असे उत्तर उपमुख्यमंत्री देवेंद्र फडणवीस यांनी आज विधानसभेत दिले. भाजप सदस्य नितेश राणे यांनी यासंदर्भात खळबळजनक आरोप सभागृहात केला होता.
उपमुख्यमंत्री देवेंद्र फडणवीस यांनी या प्रकरणात कोणकोण सहभागी आहेत याची विशेष पोलीस पथकाद्वारे चौकशी करून दोषींवर कारवाई करण्याची घोषणा केली. याविषयीची माहिती देतांना आमदार नितेश राणे म्हणाले, मुंबई बाँबस्फोटात तेव्हा २५७ निरपराध लोकांचा मृत्यू तर ७०० हून अधिक नागरिक जखमी झाले होते. दाऊदचा साथीदार सलीम कुत्ता हा ‘पेरोल वर असतांना शेवटच्या दिवशी त्याने सुधाकर बडगुजर याच्यासमवेत पार्टी केली. याचा व्हिडिओ उपलब्ध आहे.
शिवसेनाप्रमुख बाळासाहेब ठाकरे यांच्या जीवावर उठलेल्या दाऊदच्या हस्तक समवेत पार्टी करणारे कोण? बाळासाहेब ठाकरेंचे नाव घेण्याचा यांना काय अधिकार आहे? बडगुजर याचा ‘गॉडफादर’ कोण ? तसेच तो कुणाच्या संपर्कात होता, याची चौकशी करून दोषींवर कारवाई करावी, अशी मागणी राणे यांनी केली. राणे यांनी संबंधित पार्टीचे छायाचित्रही सभागृहात दाखवले.
नाशिकचे पालकमंत्री दादा भुसे यावेळी म्हणाले, दाऊद देशाचा एक क्रमाकांचा शत्रू आहे. सलीम कुत्ता हा दाऊद याचा ‘शार्पशूटर’ आणि उजवा हात होता. शिवसेना भवन उडवण्याचा ही त्याचा कट होता. सुधाकर बडगुजर हा काही वर्षांत शेकडो कोटी रुपयांचा मालक झाला. देशद्रोही लोकांसमवेत पार्टी करणे गंभीर आहे. या प्रकरणाच्या खोलात जाऊन अतिरेक्यांना पैसा कोण पुरवतो याची चौकशी करावी अशी मागणी दादा भुसे यांनी केली.
