नंदुरबार: नंदुरबार जिल्ह्यातील दोन लहान मुलांना गुलेन-बॅरी सिंड्रोम (GBS) या दुर्मिळ आजाराची लागण झाल्याने खळबळ उडाली आहे. त्यापैकी एका बालकाची प्रकृती चिंताजनक असून, त्याला व्हेंटिलेटरवर ठेवण्यात आले आहे. या घटनेनंतर आरोग्य विभाग सतर्क झाला असून, जिल्ह्यात २० आयसीयू बेड्सची व्यवस्था करण्यात आली आहे. तसेच, बाधित बालकांच्या गावातील पाण्याच्या नमुन्यांची तपासणी केली जात आहे.
गुलेन-बॅरी सिंड्रोम हा संसर्गजन्य नसला तरी, त्याची लक्षणे गंभीर असू शकतात. त्यामुळे नागरिकांनी घाबरून न जाता, लक्षणे आढळल्यास त्वरित वैद्यकीय सल्ला घ्यावा, असे आवाहन प्रशासनाने केले आहे. 
राज्यात पुणे, सोलापूर, नागपूर, सातारा या जिल्ह्यांनंतर आता नंदुरबारमध्येही जीबीएसचे रुग्ण आढळल्याने चिंता वाढली आहे. आरोग्य विभाग परिस्थितीवर लक्ष ठेवून असून, आवश्यक ती सर्व उपाययोजना राबवत आहे.