मुंबई – समाजवादी पक्षाचे आमदार अबू आझमी यांनी औरंगजेबाला “उत्कृष्ट प्रशासक” म्हणून गौरविल्याने विधिमंडळाच्या दोन्ही सभागृहात तीव्र गदारोळ झाला. या वक्तव्याच्या निषेधार्थ महायुतीच्या आमदारांनी आझमी यांच्यावर देशद्रोहाचा गुन्हा दाखल करून त्यांचे निलंबन करण्याची मागणी केली. या वादळी वातावरणामुळे विधानसभेचे आणि विधान परिषदेचे कामकाज दिवसभरासाठी तहकूब करण्यात आले.
विधानसभेत घोषणाबाजी आणि गोंधळ
विधानसभेचे कामकाज सुरू होताच महायुतीच्या आमदारांनी अध्यक्षांच्या आसनासमोर येऊन “छत्रपती शिवाजी महाराजांचा विजय असो”, “धर्मवीर संभाजी महाराजांचा विजय असो”, “हर हर महादेव” अशा घोषणा देत अबू आझमी यांच्यावर कारवाईची मागणी केली. शिवसेना (उद्धव बाळासाहेब ठाकरे गट) आमदार भास्कर जाधव यांनीही आझमी यांच्या निलंबनाची मागणी केली.
या गोंधळात विरोधी पक्ष नेते आदित्य ठाकरे हेही सहभागी झाले. त्यांनी “जय भवानी, जय शिवाजी” अशा घोषणा देत आपल्या सहकाऱ्यांना उत्तेजन दिले. गोंधळ वाढत गेला तसतसे विधानसभेचे कामकाज तीन वेळा तहकूब करावे लागले.
“देशद्रोह्याला विधिमंडळात स्थान नाही” – शिंदे
उपमुख्यमंत्री एकनाथ शिंदे यांनी संताप व्यक्त करत म्हटले की, “धर्मवीर संभाजी महाराजांवर ४० दिवस अत्याचार करणारा, हिंदू मंदिरांची तोडफोड करणारा, महिलांवर अत्याचार करणारा, बापाला तुरुंगात टाकणारा आणि भावांची हत्या करणारा औरंगजेब हा मारेकरी होता. त्याचे उदात्तीकरण करणाऱ्या अबू आझमी यांना विधानसभेत बसण्याचा अधिकार नाही.”
“औरंगजेबाची कबर तोडा” – मुनगंटीवार यांची मागणी
भाजपचे वरिष्ठ आमदार सुधीर मुनगंटीवार यांनी सरकारने औरंगजेबाची कबर तोडण्याचा निर्णय तात्काळ घ्यावा, अशी मागणी केली. महेश लांडगे यांनी “मुस्लिम मतांसाठी औरंगजेबाचे उदात्तीकरण करणाऱ्यांना ठेचून काढा,” असे सांगितले. मंत्री गुलाबराव पाटील यांनीही “आझमींना विधिमंडळात स्थान नाही,” असे स्पष्ट केले.
विधान परिषदेचेही कामकाज तहकूब
विधान परिषदेच्या सभागृहातही महायुतीच्या आमदारांनी आझमी यांच्या निलंबनाची मागणी करत जोरदार घोषणाबाजी केली. गोंधळामुळे प्रारंभी १५ मिनिटे, त्यानंतर अर्धा तास आणि अखेर दिवसभरासाठी कामकाज तहकूब करावे लागले.
कामकाज दिवसभरासाठी स्थगित
विधानसभेत वारंवार गोंधळ झाल्यानंतर अध्यक्ष राहुल नार्वेकर यांनी सदस्यांना शांत राहण्याचे आवाहन केले. मात्र, गोंधळ न थांबल्याने त्यांनी अखेर दिवसभरासाठी कामकाज तहकूब केले. विधान परिषदेचे कामकाजही दिवसभरासाठी स्थगित करण्यात आले.
