X : @therajkaran
नागपूर
अल्पवयीन युवती अत्याचार आणि ‘पोक्सो’सारख्या (POCSO act) गंभीर गुन्ह्यांच्या प्रकरणात विशेष सरकारी वकील लवकर नेमला जावा अन् या प्रकरणात पोलिसांनी एक महिन्यात निर्णय द्यावा, असे निर्देश विधान परिषद उपसभापती नीलम गोर्‍हे (Dr Neelam Gorhe) यांनी आज विधानपरिषदेत प्रश्नोत्तर तासात दिले.
या संदर्भात ‘तात्काळ कार्यवाही केली जाईल’, असे गृहमंत्री देवेंद्र फडणवीस (Devendra Fadnavis) यांनी उत्तर दिले. भाजप सदस्य गोपीचंद पडळकर (Gopichand Padalkar) यांनी यासंदर्भात प्रश्न विचारला होता. सांगली जिल्ह्यातील आटपाडी तालुक्यातील करगणी येथे १३ वर्षीय अल्पवयीन मुलीवर काही नराधमांनी अत्याचार केल्याची घटना जून-जुलै २०१३ मध्ये घडली. या प्रकरणी अद्याप आरोपींना अटक झालेली नाही. यात आटपाडी येथील पोलीस अधिकारी, कर्मचारी आरोपींना पाठिशी घालत आहेत. त्या संदर्भात शासन काय कारवाई करणार आहे असा प्रश्न त्यांनी विचारला.
उत्तर देतांना गृहमंत्री फडणवीस म्हणाले, ‘‘सदर प्रकरणात गुन्हा नोंद केला तसेच सात दिवसांत आरोपपत्र दाखल केले आहे. तपासात काही तांत्रिक अडचणी आहेत. या प्रकरणी पिडितेच्या नातेवाइकांना मारहाण झाली, तक्रार घेण्यास टाळटाळ केली गेल्याची तक्रार असेल, तर चौकशी करून योग्य ती कारवाई केली जाईल.’’
