रविकांत तुपकरांसह हजारो शेतकऱ्यांना अटक, अरबी समुद्रात सातबारे व सोयाबीन फेकत दिला लढ्याचा इशारा
मुंबई – शेतकऱ्यांच्या आंदोलनाला सरकारकडून दडपण्याचा प्रयत्न होत असताना, पोलिसांचा विरोध झुगारत हजारो शेतकऱ्यांनी सरकारविरोधात लढ्याचा इशारा दिला. रविकांत तुपकर आणि त्यांच्या सहकाऱ्यांना अटक करण्यात आली असली तरी, आंदोलकांनी अरबी समुद्रात सातबारे व सोयाबीन बुडवत आंदोलनाचा झेंडा रोवला.
शेतकऱ्यांना रोखण्यासाठी पोलिसांचे बळ, पण आंदोलन अधिक तीव्र
राज्यातील शेतकऱ्यांच्या प्रश्नांकडे सरकारने दुर्लक्ष केल्याच्या निषेधार्थ क्रांतिकारी शेतकरी संघटनेच्या नेतृत्वाखाली हजारो शेतकरी मुंबईकडे कूच करत होते. मात्र, सरकारने पोलिसांचा मोठ्या प्रमाणावर वापर करून पनवेलजवळ नढळ येथे त्यांना अडवले.
रविकांत तुपकर यांच्यासह अनेक कार्यकर्त्यांना पहाटेपासूनच नजरकैदेत ठेवण्यात आले. “आम्ही शांततेत आंदोलन करणार आहोत,” असे वारंवार सांगूनही पोलिसांनी आंदोलन चिरडण्याचा प्रयत्न केल्याचा आरोप करण्यात आला.
गोळ्या घातल्या तरी आंदोलन मागे घेणार नाही – तुपकर
दुपारी १२ वाजता रखरखत्या उन्हात पोलिसांचा मोठा ताफा तैनात करण्यात आला. मात्र, शेतकऱ्यांनी पोलिसांचा विरोध झुगारत मुंबईकडे जाण्याचा प्रयत्न केला. यात आंदोलक आणि पोलिसांमध्ये तुफान राडा झाला. पोलिसांनी लाठीचार्ज केला, तर शेतकरी जोरदार घोषणा देत पुढे जात राहिले.
रविकांत तुपकर यांनी ठाम भूमिका घेत “गोळ्या झाडल्या तरी आंदोलन थांबणार नाही, सातबारा कोरा करणे सरकारचे आश्वासन होते, त्याची आठवण करून देण्यासाठीच हा सत्याग्रह आहे,” असे स्पष्ट केले.
आम्ही दाऊद किंवा कसाब नाही, मग आम्हाला का रोखले?
पोलिसांनी आंदोलनकर्त्यांना अडवल्यानंतर तुपकर यांनी सरकारवर कडाडून टीका केली. “आम्ही शेतकरी आहोत, दाऊद किंवा कसाब नाही! मग आम्हाला अशी वागणूक का?” असा सवाल त्यांनी केला.
“शेतकऱ्यांना रोखून सरकारने त्यांची फसवणूक केली आहे. एकीकडे गुंड, दरोडेखोर मोकळे फिरत आहेत, तर दुसरीकडे जगाला अन्नधान्य पुरवणाऱ्या शेतकऱ्यांना पोलिस कोठडीत टाकले जात आहे. हे कुठले न्याय आहे?” असा संतप्त सवाल त्यांनी उपस्थित केला.
शेतकऱ्यांची लढाई संपली नाही – आंदोलनाचा झेंडा समुद्रात
शासन आणि पोलिसांनी कितीही अडथळे आणले तरी, शेतकऱ्यांनी आपले आंदोलन यशस्वी करून दाखवले. बीडच्या क्रांतिकारी शेतकरी संघटनेचे कुलदीप करपे आणि त्यांच्या सहकाऱ्यांनी पोलिसांची तटबंदी भेदून बोटीद्वारे अरबी समुद्रात प्रवेश केला आणि तेथे सातबारे तसेच सोयाबीन बुडवत सरकारला प्रतिकात्मक इशारा दिला.
“जव्हा पिकलं तव्हा लुटलं, आता देणं-घेणं फिटलं!” अशा घोषणांनी समुद्रकिनारा दणाणून गेला.
पोलिसांना अन्न-पाणी पुरवणाऱ्या शेतकऱ्यांचे मोठेपण
सरकारच्या आदेशावरून पोलिस मोठ्या संख्येने आंदोलनस्थळी तैनात होते. लाठी-काठी घेऊन आलेल्या पोलिसांना उपाशी ठेवण्याऐवजी, शेतकऱ्यांनीच त्यांना अन्न-पाणी पुरवले.
“दुश्मनावरही दातृत्व दाखवण्याची ताकद फक्त शेतकऱ्यांमध्ये आहे,” असे म्हणत अनेकांनी शेतकऱ्यांच्या या दानशूर वृत्तीचे कौतुक केले.
सरकारच्या भूमिकेवर संताप, शेतकऱ्यांची लढाई अधिक तीव्र होणार
शेतकऱ्यांच्या आंदोलनाला अशा प्रकारे दडपण्याचा सरकारचा प्रयत्न उलटाच अंगाशी येण्याची चिन्हे आहेत. राज्यातील विविध भागांतून सरकारच्या भूमिकेवर तीव्र संताप व्यक्त केला जात आहे.
“हे आंदोलन अजून संपलेले नाही, सरकारला झुकवूनच राहू,” असे तुपकर समर्थकांनी जाहीर केले आहे.
