मुंबई – पाकिस्तानला आंतरराष्ट्रीय नाणेनिधी (IMF) कडून $1 अब्ज डॉलर्सचे कर्ज मंजूर झाल्यानंतर राष्ट्रवादी काँग्रेस – शरद पवार गटाचे राष्ट्रीय प्रवक्ते क्लाईड क्रास्टो यांनी तीव्र शब्दात टीका केली आहे. त्यांनी या निर्णयावर संताप व्यक्त करत हा निधी भारतातील नागरिकांच्या हत्यांसाठी जबाबदार असलेल्या दहशतवादाला अप्रत्यक्षपणे मदत करणारा असल्याचा आरोप केला आहे.
ट्विटरवरून प्रतिक्रिया देताना क्लाईड क्रास्टो म्हणाले, “IMF ने पाकिस्तानला दिलेले $1 अब्ज डॉलर्सचे कर्ज म्हणजे आंतरराष्ट्रीय दहशतवादासाठी मंजुरी आहे. पाकिस्तान प्रायोजित दहशतवादामुळे ज्यांनी प्राण गमावले अशा भारतातील नागरिकांच्या जखमेवर IMF मीठ चोळत आहे. पाकिस्तान हा निधी आणखी विध्वंस घडवण्यासाठी वापरेल. IMF ला लाज वाटली पाहिजे.”
या वक्तव्यामुळे भारतात राजकीय प्रतिक्रिया उमटत असून अनेकांनी त्याला पाठिंबा दिला आहे, तर काही आंतरराष्ट्रीय आर्थिक संस्थांच्या भूमिकेवरही प्रश्नचिन्ह उपस्थित होत आहे. क्लाईड क्रास्टो यांच्या म्हणण्यानुसार, IMF सारख्या आंतरराष्ट्रीय संस्थांनी केवळ आर्थिक परिस्थितीच नव्हे, तर संबंधित देशाची दहशतवादविषयक भूमिका व कृती यांचाही गांभीर्याने विचार केला पाहिजे.
IMF ने पाकिस्तानला दिलेल्या निधीमुळे त्या देशातील आर्थिक व्यवस्थेला थोडी मदत मिळू शकते, मात्र भारतातील राजकीय मंडळींमध्ये आणि जनमानसात हा मुद्दा ‘दहशतवादास पोसणारा आर्थिक आधार’ म्हणून पाहिला जात आहे.
क्लाईड क्रास्टो यांच्या या प्रतिक्रिया भारत-पाकिस्तान संबंधांवर आणि जागतिक आर्थिक संस्थांच्या निर्णय प्रक्रियेवरही नवीन प्रश्न उपस्थित करत आहेत.
