Twitter : @AnantNalavade
मुंबई
अंधेरी येथील अत्याधुनिक सेव्हन हिल्स हॉस्पिटल (Seven Hills Hospital, Andheri) आरोग्य सेवेच्या दृष्टीने अत्यंत महत्वाचे असल्याने हे हॉस्पिटल खाजगी कंपनीच्या घशात घालण्याऐवजी मुंबई महापालिकेनेच ते ताब्यात घ्यावे, अशी मागणी प्रदेश काँग्रेसने मंगळवारी येथे केली.
शहराच्या मोक्याच्या जागी १६ एकर जागेवर असलेल्या १५०० खाटांच्या या हॉस्पिटलमध्ये सर्व प्रकारच्या सोयी सुविधा आहेत. सध्या हे हॉस्पिटल दिवाळखोरीत निघालेले असल्याने ते ताब्यात घेऊन ‘एम्स’सारखे (AIIMS) हॉस्पिटल येथे सुरु करता येणे शक्य आहे. मुंबई व महाराष्ट्राच्या जनतेला उत्तम आरोग्य सेवा पुरवण्यासाठी हे हॉस्पिटल महत्वाची भूमिका बजावू शकते, याकडे काँग्रेसचे प्रदेश सरचिटणीस व मुंबईचे माजी उपमहापौर राजेश शर्मा (Congress leader Rajesh Sharma) यांनी येथे पत्रकारांशी बोलताना सरकारचे लक्ष वेधले.
यासंदर्भात मुख्यमंत्री एकनाथ शिंदे (CM Eknath Shinde) यांनाही एक पत्र पाठवले असून मुंबई महानगरपालिका (BMC) आणि राज्य सरकारने सार्वजनिक गरजा लक्षात घेऊन व्यापक दृष्टीकोन ठेवण्याची गरज असल्याचे शर्मा म्हणाले. या हॉस्पिटलला वैद्यकीय संशोधन केंद्र आणि शिक्षणासह आंतरराष्ट्रीय दर्जाचे हॉस्पिटल म्हणून विकसित करण्याचा विचार करणे आवश्यक असल्याचेही नमूद करण्यात आले होते.
सेव्हन हिल्स हॉस्पिटलच्या आवारात शिल्लक असलेल्या जागेवर मेडीकल व नर्सिंग कॉलेज सुरु करता येऊ शकते. सेव्हन हिल्स हॉस्पिटलच्या जागेची मुळ मालकी हक्क मुंबई महानगरपालिकेची आहे. महानगरपालिकेने ही जागा सेव्हन हिल्स हॉस्पिटलला लीजवर दिलेली आहे. मुंबई महापालिकेने दुसऱ्या कोणत्याही खाजगी कंपनीच्या ताब्यात ती जागा जाऊ न देता स्वतः ताब्यात घेतली तर मुंबईमध्ये एक प्रशस्त, अत्याधुनिक, सर्व सोयीनीयुक्त असे महत्वाचे आरोग्य केंद्र बनू शकते, असेही शर्मा यांनी स्पष्ट केले आहे.
अंधेरीतील मोक्याच्या ठिकाणी असलेल्या या हॉस्पिटलची बाजार भावानुसार किंमत तीन ते चार हजार कोटी रुपये आहे. पण या जागेकडे व्यापारी दृष्टीकोनातून न पाहता मानवी दृष्टीकोनातून पाहिले पाहिजे. याच हॉस्पिटलमध्ये कोराना महामारीच्या काळात कोवीड सेंटर (covid Centre) उभे केले होते, ज्याचा मुंबईकरांना मोठा फायदाही झाला होता. एवढे प्रशस्त व सुविधायुक्त नवीन हॉस्पिटल उभे करणे सोपे नाही. मुंबईची वाढती लोकसंख्या लक्षात घेता त्यांच्या आरोग्य सेवांसाठी हे हॉस्पिटल एक मोठी संधी असून त्यासाठी सध्या असलेल्या सर्व सुविधांचा विचार करता मुंबई महानगरपालिकेने वेळ न घालवता हे हॉस्पिटल ताब्यात घेऊन मुंबईकरांना अत्याधुनिक आरोग्य सेवा देण्यासाठी पुढाकार घ्यावा, अशीही मागणी शर्मा यांनी केली.
