मुंबई: अंधेरी येथील सेव्हन हिल्स हॉस्पिटल मुंबई महानगरपालिकेच्या ताब्यात द्यावे, अशी मागणी होत असून, हे हॉस्पिटल उद्योगपती मुकेश अंबानी यांच्या ताब्यात देण्याचा प्रयत्न सुरू असल्याचा आरोप करण्यात आला आहे. या निर्णयाचा विरोध करण्यासाठी ६ नोव्हेंबर रोजी सकाळी ११ वाजता हॉस्पिटलसमोर तीव्र आंदोलन करण्यात येणार असल्याची माहिती अंधेरी विकास समितीने दिली.
या संदर्भात मुंबईचे माजी उपमहापौर व काँग्रेसचे उपाध्यक्ष राजेश शर्मा म्हणाले की, “सेव्हन हिल्स हॉस्पिटल मुंबई महानगरपालिकेच्या ताब्यात घेण्यासाठी आम्ही मागील काही महिन्यांपासून मुख्यमंत्री देवेंद्र फडणवीस, बीएमसी आणि संबंधित यंत्रणांकडे पाठपुरावा केला. मात्र कोणत्याही स्तरावरून प्रतिसाद मिळाला नाही. सरकारला मुंबईकरांच्या आरोग्याची चिंता नसून फक्त उद्योगपतींच्या फायद्याकडे लक्ष आहे.”
शर्मा यांनी पुढे सांगितले, “या जागेवर महापालिका अत्याधुनिक वैद्यकीय संशोधन केंद्र, शिक्षण सुविधा आणि आंतरराष्ट्रीय दर्जाचे हॉस्पिटल विकसित करू शकते. तसेच उर्वरित जागेवर मेडिकल व नर्सिंग कॉलेज सुरु करण्याचीही संधी आहे.”
सेव्हन हिल्स हॉस्पिटलची जमीन मुंबई महानगरपालिकेच्या मालकीची असून, लीजवर दिली आहे. “महापालिकेने ही जमीन परत ताब्यात घेतली तर ३०००–४००० कोटी रुपयांची प्रगत आरोग्य सुविधा सर्व सामान्यांसाठी उपलब्ध होऊ शकते. ही जागा व्यापारी नव्हे तर मानवी दृष्टिकोनातून पाहण्याची गरज आहे,” असे शर्मा यांनी सांगितले.
