मुंबई– मुंबई महानगरपालिकेची निवडणूक महाविकास आघाडी म्हणून लढवायचे स्वप्न पाहणाऱ्या काँग्रेसला आज स्पष्ट फटका बसला. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी यशवंतराव चव्हाण केंद्रातील बैठकीत थेट घोषणा करत आपला पक्ष उद्धव ठाकरे यांच्या शिवसेना आणि राज ठाकरे यांच्या मनसेसोबत निवडणूक लढवणार असल्याचे संकेत दिले आहेत.
काँग्रेसने अलीकडेच ’मनसे नको’ अशी अट ठेवत महाविकास आघाडीचा revival करण्याचा प्रयत्न केला होता. मात्र पवारांनी आज घेतलेली भूमिका या अटीच्या नेमक्या उलट आहे — त्यामुळे काँग्रेस अक्षरशः तोंडघशी पडल्याचे राजकीय वर्तुळात बोलले जात आहे.
राष्ट्रवादीच्या बैठकीत ठरलेली ठाम भूमिका
आजच्या महत्वाच्या बैठकीत राष्ट्रवादी (शरद पवार) पक्षातील बहुतेक वरिष्ठ नेते, पदाधिकारी, आमदार आणि खासदारांनी एकमुखाने मांडले: भाजप वगळता इतर पक्षांसोबत संवाद खुला ठेवावा, मात्र मनसेसोबत निवडणूक लढवण्यावर ठाम राहावे, काँग्रेसच्या हटवादी भूमिकेची पर्वा करू नये
ही भूमिका पवारांनीही समर्थनीय मानत स्पष्ट शब्दांत सांगितले की, “मुंबई महानगरपालिका तसेच सर्वच मनपा निवडणुका राष्ट्रवादी दोन्ही ठाकरे बंधूंसोबत लढवेल.” या भूमिकेने काँग्रेसच्या आशांना मोठा धक्का बसला आहे.
मुंबईतील समीकरणांना नवे वळण
राष्ट्रवादी जर शिवसेना (उद्धव) आणि मनसेसोबत एकत्र लढणार असेल, तर मुंबईतील राजकीय गणिताचं चित्र पूर्णपणे बदलण्याची शक्यता आहे. यात भर म्हणजे — समाजवादी पक्षही या नव्या समीकरणात सहभागी होण्यास उत्सुक असल्याचे संकेत मिळत आहेत. हा बदल महाविकास आघाडीच्या संकल्पनेलाच धक्का देणारा ठरू शकतो.
काँग्रेसच्या भूमिकेवरील पवारांचा हल्ला
मागील आठवड्यात काँग्रेसने पवारांची भेट घेऊन ’मनसे नको’ अशी अट घातली होती. यावर पवारांनी आजच्या बैठकीत स्पष्ट प्रश्न उपस्थित केला: “मराठीचा प्रश्न, मतचोरीचा प्रश्न गंभीर असेल तर काँग्रेसला निवडणुकीतच का लागलं नाकी?” हा मुद्दा उपस्थित होताच राष्ट्रवादी कार्यकर्त्यांत टाळ्यांचा कडकडाट झाला. पवारांनी काँग्रेसच्या अटीवर रोखठोक शब्दांत सपशेल नकार दिला.
नव्या राजकीय समीकरणाची चाहूल
पवारांचा आजचा निर्णय केवळ निवडणूक डावपेच नाही. तो शिवसेना (उद्धव), मनसे, राष्ट्रवादी (शरद पवार गट) या तिघांमध्ये नव्या ‘मराठी एकजूट’ समीकरणाची चाहूल देणारा आहे.
काँग्रेसला सोडून ’ठाकरेंकडे’ झुकणाऱ्या राष्ट्रवादीच्या भूमिकेमुळे मुंबईत नव्या राजकीय महासंग्रामाची पटकथा तयार होत असल्याचे जाणवते. आता खरी उत्सुकता याची — महानगरपालिकेत राष्ट्रवादी किती प्रभाव दाखवते आणि शरद पवार दोन्ही ठाकरे बंधूंना कितपत प्रामाणिकपणे साथ देतात? यावरच आगामी सारे गणित अवलंबून आहे.
