मुंबई : हाफकिन बायो-फार्मास्युटिकल महामंडळातील कथित आर्थिक आणि प्रशासकीय अनियमिततांचा मुद्दा गुरुवारी विधानसभेत चर्चेचा विषय ठरला. राष्ट्रवादी काँग्रेस (शरदचंद्र पवार) पक्षाचे विधिमंडळ पक्षनेते जयंत पाटील यांनी भारताच्या नियंत्रक व महालेखापरीक्षक (CAG) अहवालातील निरीक्षणांचा संदर्भ देत सरकारकडे स्पष्टीकरण आणि कारवाईची मागणी केली.
जयंत पाटील यांनी सभागृहात दावा केला की, पोलिओ लसींच्या वाहतुकीबाबत विमान वाहतुकीची बिले सादर करण्यात आली, मात्र प्रत्यक्ष वाहतूक रस्तेमार्गे झाल्याचे कॅगच्या निरीक्षणांत नमूद आहे. तसेच, जागतिक आरोग्य संघटनेच्या (WHO) सूचनांचे पालन न झाल्यामुळे हाफकिनला मोठ्या मूल्याचे कंत्राट गमवावे लागल्याचा मुद्दाही त्यांनी उपस्थित केला.
याशिवाय, परदेशातील कथित बोगस खात्यात निधी वर्ग करणे, चीनमधून यंत्रसामग्री खरेदीसाठी आगाऊ रक्कम अडकणे, नियमबाह्य नियुक्त्या आणि अधिकाऱ्यांबाबतच्या तक्रारी अशा विविध मुद्द्यांचाही त्यांनी उल्लेख केला.
या सर्व प्रकरणांची सखोल चौकशी करून जबाबदारी निश्चित करावी आणि सरकारने ॲक्शन टेकन रिपोर्ट (ATR) विधानसभेत सादर करावा, अशी मागणी जयंत पाटील यांनी केली.
हाफकिन ही राज्यातील सार्वजनिक आरोग्य क्षेत्रातील महत्त्वाची संस्था असल्याने कॅगच्या निरीक्षणांवर सरकारची भूमिका आणि पुढील कारवाईकडे आता लक्ष लागले आहे.
