मुंबई : मराठी भाषा दिनाचे औचित्य साधून मुंबई मराठी पत्रकार संघ आणि जागतिक मराठी अकादमीच्या संयुक्त विद्यमाने मराठी कवितेचा जागर रंगला. ज्येष्ठ कवी रामदास फुटाणे, अशोक नायगावकर, महेश केळूसकर यांच्यासह अनेक युवा कवी आणि पत्रकारांनी या सोहळ्यात आपल्या कविता सादर केल्या.
मराठीला अभिजात भाषेचा दर्जा मिळाल्याने आता तिचा दर्जा टिकवण्याची जबाबदारी आपल्यावर आहे. जागतिक मराठी अकादमी आणि मुंबई मराठी पत्रकार संघ यांचे सहकार्य अधिक दृढ होईल, तसेच युरोपमध्ये मराठी अधिवेशन भरवता येईल का, याचा प्रयत्न करावा, असे मत उपस्थित मान्यवरांनी व्यक्त केले.
या कवी संमेलनात रामदास फुटाणे, अशोक नायगावकर, महेश केळूसकर, शशिकांत तिरोडकर, संकेत म्हात्रे, प्रथमेश पाठक, जितेंद्र लाड, मंगेश विश्वासराव, भगवान निळे, सदानंद खोपकर, अजय वैद्य आणि प्रसाद मोकाशी यांनी आपल्या कविता सादर करून रसिकांना मंत्रमुग्ध केले.
यावेळी मुंबई मराठी पत्रकार संघाच्या सदस्यांनी लिहिलेल्या पुस्तकांचे तसेच कविश्रेष्ठ वि. वा. शिरवाडकर यांच्यावर वर्तमानपत्रांत प्रकाशित लेख आणि मुलाखतींच्या कात्रणांचे प्रदर्शन भरवण्यात आले. या दोन दिवसीय प्रदर्शनाचे उद्घाटन रामदास फुटाणे यांच्या हस्ते करण्यात आले.
कार्यक्रमाचे प्रास्ताविक राजेंद्र हुंजे यांनी केले, तर आभार आत्माराम नाटेकर यांनी मानले.
