ठाकरे गटाच्या ‘शिवबंधन’वर थेट हल्ला
मुंबई – आगामी स्थानिक स्वराज्य संस्थांच्या निवडणुका डोळ्यांसमोर ठेवून उपमुख्यमंत्री एकनाथ शिंदे यांच्या नेतृत्वाखालील शिवसेनेने मुंबईत सदस्य नोंदणी मोहीम आक्रमकपणे सुरू केली आहे. विशेषतः पश्चिम आणि पूर्व उपनगरांत शिंदे गटाच्या कार्यकर्त्यांनी ‘बॅनरबाजी’च्या माध्यमातून ठाकरे गटावर थेट निशाणा साधला आहे.
मुंबईतील अनेक ठिकाणी लावलेल्या बॅनरांवर एकनाथ शिंदे यांचे आकर्षक चित्र, धनुष्यबाण चिन्ह आणि मध्यभागी “मैत्री धाग्याची नाही, मैत्री वाघाशी!” असा ठळक मजकूर झळकत आहे. हे बॅनर ठाकरे गटाच्या ‘शिवबंधन’ सदस्य नोंदणी मोहिमेची अप्रत्यक्ष खिल्ली उडवतात, तसेच ‘खरी शिवसेना हीच’ असल्याचा संदेश देण्याचा प्रयत्न करतात.
या बॅनरांमधून शिंदे गटाने शिवसेनेची ओळख ‘विकास, कार्यक्षमतेचा वाघ आणि खऱ्या विचारांची ताकद’ अशी दर्शवत नवीन कार्यकर्त्यांना आकर्षित करण्याचा प्रयत्नही केला आहे. या प्रकारामुळे येत्या काळात, विशेषतः मुंबईत, ठाकरे गट आणि शिंदे गटातील संघर्ष अधिक तीव्र होण्याची शक्यता नाकारता येत नाही.
ठाकरे गटाने काही महिन्यांपूर्वी ‘शिवबंधन’ मोहीम सुरू केली होती. त्याच्या प्रत्युत्तरात, शिंदे गटाने ‘मैत्री वाघाशी’ हा थेट टोला लगावत सदस्य नोंदणीला वेग दिला आहे. आतापर्यंत ठाकरे गटाचे सुमारे ७० माजी नगरसेवक शिंदे यांच्या शिवसेनेत प्रवेश करीत आले असून, अलीकडेच ठाकरे गटाचे विश्वासू व मुंबई विद्यापीठाचे सिनेट सदस्य संजय घाडी व त्यांची पत्नी, माजी नगरसेविका संजना घाडी, यांनीही शिंदे गटात प्रवेश केला.
हे सगळे लक्षात घेता, एकनाथ शिंदे यांनी आगामी मुंबई महानगरपालिका निवडणुकीला ‘अस्तित्वाची लढाई’ मानत आपला संपूर्ण पक्ष मुंबईत झोकून देण्याचे आदेश दिले आहेत. त्यांच्या आदेशानुसार माजी नगरसेवक, आमदार, खासदार, पदाधिकारी आणि कार्यकर्ते यांना प्रचारात झोकून देण्यास सांगितले असून, त्याची सुरुवात ‘बॅनरबाजी’ने झाली आहे.
