मुंबई
बनावट कागदपत्रान्वये मुख्यमंत्री सहाय्यता निधी या योजनेअंतर्गत अर्थसहाय्य घेतल्याची धक्कादायक घटना समोर आली आहे. आरटीआय कार्यकर्ते अनिल गलगली यांनी मुख्यमंत्री सचिवालयाकडे मुख्यमंत्री सहाय्यता निधी अंतर्गत बोगस प्रकरण किंवा शासनाची फसवणूक घडल्यासंबंधातील माहिती मागितली होती. यानंतर मुख्यमंत्री सचिवालयाने बनावट कागदपत्रान्वये मुख्यमंत्री सहाय्यता निधीअंतर्गत अर्थसहाय्य घेतल्याची माहिती आरटीआय कार्यकर्ते अनिल गलगली यांना दिली आहे. याबाबत मुख्यमंत्री सचिवालयाने ठाण्यातील त्या रुग्णालयावर पोलीस आयुक्तांना गुन्हा दाखल करण्याची सूचनाही दिली आहे.
मुख्यमंत्री सहाय्यता निधीचे सहाय्यक लेखा अधिकारी संजय तांबे यांनी अनिल गलगली यांस कळविले की, डॉ. अनुदुर्ग ढोणी गणपती मल्टीस्पेशालिटी हॉस्पिटल आंबिवली पूर्व ठाणे या रुग्णालयाने बनावट कागदपत्रान्वये अर्थसहाय्य प्राप्त केल्याचे दिसून आले आहे. रुग्णालयातील डॉक्टर, कर्मचारी आणि डॉक्टरांच्या सान्निध्यात आलेल्या व्यक्ती यांचा संशय आल्याने पुढील चौकशी करुन आवश्यकतेनुसार गुन्हा दाखल करण्याबाबत मुंबईच्या पोलीस आयुक्तांना ६ नोव्हेंबर २०२३ रोजी पत्राने कळविण्यात आले आहे.
अनिल गलगली यांच्या मते मुख्यमंत्री सहाय्यता निधीच्या माध्यमातून अर्थसहाय्य प्राप्त झाल्यानंतर लाभार्थ्यांची यादी संपूर्ण विवरणासहित संकेतस्थळावर प्रसिद्ध करण्याची आवश्यकता आहे. यामुळे अशी अनेक प्रकरणे बाहेर येतील आणि बोगसगिरीवर आळा बसेल. यामुळे खऱ्या लाभार्थ्यांना फायदा होईल.
