मुंबई – कुरकुंभ (ता. दौंड, जि. पुणे) औद्योगिक क्षेत्रात होणाऱ्या प्रदूषणावर नियंत्रण ठेवण्यासाठी महाराष्ट्र औद्योगिक विकास महामंडळ (MIDC) आणि महाराष्ट्र प्रदूषण नियंत्रण मंडळाने संयुक्त मोहिम राबवावी, प्रदूषणाचे नमुने घेऊन आवश्यक ती कारवाई करावी आणि ग्रामपंचायतीच्या प्रतिनिधींचा सहभागही घ्यावा, असे निर्देश कामगार मंत्री ॲड. आकाश फुंडकर यांनी दिले.
पुण्यातील अल्कली अमाइन्स कंपनीतील नुकत्याच झालेल्या स्फोटानंतर निर्माण झालेल्या परिस्थितीच्या पार्श्वभूमीवर झालेल्या बैठकीत ते बोलत होते. या बैठकीत उद्योग, पर्यावरण व कामगार विभागाचे वरिष्ठ अधिकारी, आमदार राहुल कुल आणि एमआयडीसीमधील अधिकारी उपस्थित होते.
कुरकुंभ परिसरात मोठ्या प्रमाणावर रासायनिक उद्योग असल्यामुळे संभाव्य अपघात टाळण्यासाठी तातडीच्या उपाययोजना गरजेच्या असून, स्वतंत्र पथक नेमून औद्योगिक परिसराची सखोल तपासणी करावी, असे आदेशही मंत्री फुंडकर यांनी दिले.
आमदार राहुल कुल यांनी CETP (कॉमन इफ्लुएंट ट्रीटमेंट प्लांट) संदर्भात प्रश्न उपस्थित करताना सांगितले की, जे उद्योग प्रदूषित पाणी निर्माण करतात, तेच CETP चालवत असल्यामुळे प्रदूषण नियंत्रणावर प्रश्नचिन्ह उभे राहते. यावर धोरणात्मक फेरआढावा घेण्याचे निर्देशही देण्यात आले.
यावेळी “महाराष्ट्र आग प्रतिबंधक व जीव संरक्षक उपाययोजना अधिनियम, २००६” अंतर्गत फायर ऑडिट नियम तात्काळ लागू करण्यासाठी उद्योग विभागाशी समन्वय साधण्याच्या सूचनाही कामगार मंत्र्यांनी दिल्या.
प्रदूषण आणि सांडपाण्यावर नियंत्रण ठेवण्याची जबाबदारी संबंधित विभागांची असल्यामुळे आवश्यक ती कारवाई करण्याचे आदेश त्यांनी संबंधित यंत्रणांना दिले.
