पंकजा मुंडे, सुधीर मुनगंटीवार आणि रवींद्र चव्हाण लोकसभा निवडणूक शर्यतीतून बाद
X : @vivekbhavsar
मुंबई: भारतीय जनता पक्षाने (BJP) आज राज्यातील 23 लोकसभा मतदारसंघासाठी 46 निरीक्षकांची यादी जाहीर केली. या यादीत ईशान्य मुंबईतील भाजपाचे विद्यमान खासदार मनोज कोटक (MP Manoj Kotak) यांचे नाव असून त्यांच्याकडे नागपूर लोकसभा मतदारसंघाची जबाबदारी देण्यात आली आहे. त्यामुळे कोटक यांना लोकसभेचे तिकीट नाकारले जाईल, हे स्पष्ट झाले आहे. या मतदारसंघात किरीट सोमय्या(Kirit Somaiya) यांचे नाव इच्छुकांच्या यादीत आघाडीवर असले तरीही मिहिर कोटेचा (MLA Mihir Kotecha) आणि प्रकाश मेहता यांचे नाव देखील स्पर्धेमध्ये असल्याचे म्हटले जात आहे.
दरम्यान, आगामी लोकसभा निवडणुकीत पंकजा मुंडे (Pankaja Munde), सुधीर मुनगंटीवार (Sudhir Mungantiwar) यांना उमेदवारी दिली जाईल, अशी अटकळ बांधली जात असताना या दोघांकडेही अनुक्रमे बीड आणि उत्तर मुंबईची जबाबदारी सोपवण्यात आली आहे. त्यामुळे हे दोघेही लोकसभा निवडणुकीच्या शर्यतीतून बाद झाल्याचे म्हटले जात आहे. चंद्रपूरचे माजी खासदार आणि केंद्रीय ओबीसी समितीचे अध्यक्ष हंसराज अहिर हे देखील चंद्रपूर लोकसभा निवडणूक लढण्यास इच्छुक आहेत. मात्र, त्यांच्याकडे रावेरची जबाबदारी देण्यात आल्यामुळे अहिर देखील लोकसभेच्या स्पर्धेतून बाद झाले आहेत.
नवी मुंबईचे गणेश नाईक यांना ठाणे लोकसभा मतदारसंघातून उमेदवारी दिली जाईल, अशा चर्चा होत्या. मात्र, नाईक यांच्याकडे भिवंडीचे निरीक्षक म्हणून जबाबदारी देण्यात आल्यामुळे नाईक देखील लोकसभा निवडणूक लढणार नाहीत, हे स्पष्ट झाले आहे. त्याचप्रमाणे रवींद्र चव्हाण यांच्याकडे अहमदनगरची जबाबदारी सोपवण्यात आल्यामुळे ते देखील लोकसभा निवडणुकीच्या स्पर्धेतून बाद झाले आहेत.
भारतीय जनता पक्ष लोकसभा निवडणुकीत विद्यमान 14 ते 16 खासदारांना वगळून त्या ठिकाणी नवीन चेहरे देतील, अशी चर्चा आहे. पक्षाचे ज्येष्ठ आणि अनुभवी आमदार यांना लोकसभेत पाठवून विधानसभेत नवीन आणि तरुण चेहरे दिले जातील, अशीही चर्चा आहे. ज्या ज्येष्ठ आमदारांची नावे लोकसभेसाठी घेतली जात होती, त्यात पंकजा मुंडे, सुधीर मुनगंटीवार, आशिष शेलार, रवींद्र चव्हाण या नावांचा समावेश होता. मात्र त्यांच्याकडे वेगवेगळ्या लोकसभा मतदारसंघात निरीक्षक पदाची जबाबदारी देण्यात आल्यामुळे हे नेते लोकसभा निवडणूक लढवणार नाहीत, ही बाब स्पष्ट झाली आहे.
पुण्यातून माजी महापौर मुरलीधर मोहोळ यांच्या नावाची चर्चा होती. मात्र, त्यांच्याकडेही सोलापूर मतदारसंघाची जबाबदारी देण्यात आल्यामुळे मोहोळ देखील स्पर्धेतून बाद झाले आहेत. पुण्यात देवेंद्र फडणवीस यांचे निकटवर्तीय आणि विश्वासू जगदीश मुळीक यांच्या नावाची चर्चा आहे.
भाजपचे ज्येष्ठ नेते योगेश सागर यांना गोपाळ शेट्टी यांच्या जागी उमेदवारी दिली जाईल, अशी चर्चा होती. मात्र सागर यांच्याकडे भिवंडी लोकसभा मतदारसंघाची जबाबदारी सोपवण्यात आली आहे. त्यामुळे सागर यांचे नाव देखील या स्पर्धेतून बाद झाले आहे.
Also Read: मुंबईत मालमत्ता करत सूट; विधेयकाला विधान परिषदेत मंजूरी
