ठाणे
भाजप आमदार गणपत गायकवाड यांच्या अडचणी वाढत असल्याचं चित्र आहे. पोलीस स्टेशनमध्ये गोळीबार केल्यानंतर त्यांना अटक करण्यात आली आहे. आता गणपत गायकवाड यांच्याविरोधात उल्हासनगर-हिल लाईन पोलीस ठाण्यात अॅट्रॉसिटीअंतर्गत गुन्हा दाखल करण्यात आला आहे.
कल्याणमधील द्वारली गावातील जमीन मालकाला जातीवाचक शब्द वापरल्याने आमदार गणपत गायकवाड यांच्यासह इतर सात जणांवर गुन्हा दाखल करण्यात आला. पोलीस याप्रकरणी अधिक तपास करत आहेत. सध्या आमदारांसह आरोपींना न्यायालयाने ११ दिवसांची पोलीस कोठडी सुनावली आहे.
भाजप आमदार गणपत गायकवाड यांनी शिंदे गटाचे कल्याणचे शहरप्रमुख महेश गायकवाड यांच्यावर उल्हासनगर पोलीस ठाण्यात ६ गोळ्या झाडल्या. जागेच्या वादातून भाजप आमदार गणपत गायकवाड यांनी महेश गायकवाड आणि त्यांचा सहकारी राहुल पाटील यांच्यावर गोळीबार केल्याचं सांगितलं जात आहे.
ज्या जागेवरुन वाद सुरू होता, त्या प्रकरणात भाजप आमदारांसह जितेंद्र पारीक, विठ्ठल चिकणकर, शिवाजी फुलोरे, सौरभ सिंग, छोटू खान, चंद्रकांत ओल, नगेश वारघेट यांच्यावर गुन्हा दाखल करण्यात आला आहे. जणांविरोधात अॅट्रॉसिटीचा गुन्हा दाखल करण्यात आला आहे. अंबरनाथ तालुक्यातील द्वारली गावात ३१ जानेवारी रोजी जागेवरुन गायकवाडांमध्ये वाद झाला होता. यावेळी गणपत गायकवांनी जातीवाचक शिवीगाळ केल्याने जागा मालक शेतकऱ्यांनी यासंदर्भात अॅट्रॉसिटीची तक्रार दाखल केली आहे.
