मुंबई : गेल्या काही दिवसांपासून चर्चेत असलेल्या माढा लोकसभा मतदारसंघात राजकीय घडामोडीना चांगलाच वेग आला आहे . या मतदारसंघात आता उपमुख्यमंत्री देवेंद्र फडणवीस (Devendra Fadnavis) यांनी धैर्यशील मोहिते पाटील (Dhairyasheel Mohite Patil) यांच्या विरोधात नवा डाव टाकत मोहिते पाटील यांचे विरोधक आणि धनगर समाजाचे नेते उत्तम जानकर (Uttam Jankar) यांना गळाला लावण्यासाठी त्यांना आमदारकीची मोठी ऑफर दिली आहे .मात्र यावर उत्तम जानकर यांनी कोणताही निर्णय घेतलेला नसून ते 19 एप्रिलला आपली भूमिका मांडणार असल्याची माहिती समोर आली आहे .
या मतदारसंघात भाजपनं रणजितसिंह नाईक-निंबाळकर ( Ranjitsingh Naik Nimbalkar ) यांना उमेदवार जाहीर केल्यानंतर धैर्यशील मोहिते-पाटील यांनी भाजपला रामराम करत शरद पवारांच्या राष्ट्रवादीमध्ये प्रवेश केला . यानंतर या मतदारसंघात मोहिते पाटील यांचे कट्टर विरोधक आणि माळशिरस तालुक्यातील तुल्यबळ नेता अशी ओळख असणाऱ्या उत्तम जानकर यांची समजूत काढत उपमुख्यमंत्री देवेंद्र फडणवीस यांनी त्यांची दोन वेळा भेट घेतली होती . त्यानंतर पुन्हा सोमवारी जानकर यांच्यासाठी खास विमान पाठवून त्यांना नागपूर येथे बोलावण्यात आलं .याठिकाणी त्यांना आमदारकीची ऑफर देत तुम्ही मागाल ते देऊ.असे आश्वासन फडणवीस यांनी दिल असल्याची माहीती समोर आली आहे . मात्र जानकर यांच्याकडून या ऑफरवर कोणतीच प्रतिक्रिया आलेली नाही . त्यामुळे ते काय निर्णय घेणार याकडे राजकीय वर्तुळाचे लक्ष लागले आहे .
दरम्यान उत्तम जानकर यांनी त्यांच्या आणि उपमुख्यमंत्री फडणवीस यांच्यात झालेल्या चर्चेबद्दल आपल्या प्रमुख सहकाऱ्यांशी गरुड बंगल्यावर चर्चा केली . यानंतर ते आता 19 एप्रिल रोजी सर्व कार्यकर्त्यांच्या समवेत बैठक घेऊन भाजप की मोहिते पाटील याचा निर्णय केला जाणार आहे. यामुळेच खुद्द फडणवीस यांनी निमंत्रण देऊनही जानकर यांनी माढा लोकसभेचे उमेदवार खासदार रणजित निंबाळकर यांच्या उमेदवारी अर्ज दाखल करण्यास जाणार नसल्याचं सांगितलं आहे. आता उत्तम जानकर यांच्या भूमिकेकडे मोहिते पाटील आणि भाजप या दोघांचंही लक्ष लागून राहिलं असून जानकर कोणाला मदत करणार याचा निर्णय 19 एप्रिल रोजी होणाऱ्या बैठकीत होणार आहे. जानकर यांनी फडणवीस यांना कबूल केल्याप्रमाणे आपली ताकद भाजपच्या मागे उभी केल्यास निंबाळकर यांना निवडणूक सोपी होणार आहे. मात्र जानकर हे मोहिते पाटील यांच्यामागे राहिले तर, भाजपाला विजयासाठी निकरीचे प्रयत्न करावे लागणार आहेत .
