मुंबई
आजपासून शिर्डी येथे राष्ट्रवादी काँग्रेसच्या शरद पवार गटाच्या दोन दिवसीय शिबिराचं आयोजन करण्यात आलं आहे. यावेळी जयंत पाटील यांनी कार्यकर्त्यांना संबोधित केलं.
यावेळी ते म्हणाले, गेल्या शिबीरात अनेक दिग्गज होते. ते निघून गेल्यानंतर मागच्या फळीत बसलेल्यांना पुढे बसण्याची संधी मिळाली. त्यामुळे तुम्हा सर्वांचं प्रमोशन झालं असून मी सर्वांना शुभेच्छा देतो. नेत्यांनी पक्ष सोडल्यामुळे तुम्हाला पुढे बसण्याची संधी मिळाली. त्यामुळे पुढे बसलेल्यांनी जे गेले त्यांचं आभार माना, अशा शब्दात अजित पवार गटाला चिमटा काढला.
घराघरात राष्ट्रवादीचं अभियान राबवा, काही मतदारसंघात प्रामाणिक प्रयत्न झाल्याने अभियान घराघरात पोहोचलं. आपण राज्यातील अनेक ठिकाणी शेतकऱ्यांचा आक्रोश मोर्चा काढला. डॉ. अमोल कोल्हे यांनी पुणे जिल्ह्यात दौरा काढला. त्याला चांगला प्रतिसाद मिळाला. त्यांना पाडण्याचा विडा आता काही जणांनी उचलला आहे.
जोपर्यंत छत्रपती शिवाजी महाराज आणि आई भवानीचा आशीर्वाद आहे, तोपर्यंत अमोल डरने की बात नही… सगळा पक्ष ताकदीने तुमच्या मागे उभे राहील, अशा शब्दात जयंत पाटलांनी अजित पवारांना टोगा लगावला.
