X: @therajkaran
कथित खिचडी घोटाळा (Khichdi scam) प्रकरणी ठाकरे गटाचे सचिव आणि आदित्य ठाकरे (Aaditya Thackeray) यांचे निकटवर्तीय सूरज चव्हाण (Suraj Chavan) यांच्याविरोधात सक्तवसुली संचालनालयाने विशेष सत्र न्यायालयात आरोपपत्र दाखल केले आहे. ईडीकडून (ED) चव्हाण यांच्याशी संबंधित ८८ लाख ५१ हजारांची संपत्ती जप्त करण्यात आली होती. यामध्ये मुंबईतील एक फ्लॅट आणि रत्नागिरीतील जमीन यांचा समावेश आहे.
न्यायाधीश एम.जी देशपांडे (M. G. Deshpande) यांच्यासमोर हे आरोपपत्र सादर करण्यात आले. या प्रकरणातील गैरव्यवहार रकमेतील सुमारे एक कोटी २५ लाख रुपये चव्हाण यांच्या वैयक्तिक बँक खात्यात आणि १० लाख रुपये त्यांची भागीदारी असलेली कंपनीच्या बँक खात्यात वळविण्यात आल्याचा आरोप आहे. या रक्कमेचा वापर चव्हाण यांनी मालमत्ता खरेदी करण्यासाठी आणि दुग्ध व्यवसायात गुंतवणूक (Investment in dairy business) करण्यासाठी केला, असा आरोप आहे. या गैरव्यवहारातील सुमारे एक कोटी ३५ लाख रुपये चव्हाण यांच्याकडे गेल्याचा आरोप असून त्याबाबत ईडी तपास करीत आहे.
सूरज चव्हाण यांना सक्तवसुली संचालनालयाने १७ जानेवारी रोजी अटक केली असून सध्या ते न्यायालयीन कोठडीत आहेत. मुंबई पोलिसांच्या आर्थिक गुन्हे शाखेने (EOW) सप्टेंबर २०२३ मध्ये याप्रकरणासंबंधित गुन्हा दाखल केला होता. खिचडी वितरणात ६ कोटी ३७ लाख रूपयांचा गैरव्यवहार झाल्याचा आरोप त्यांच्यावर आहे. मुंबईतील आग्रीपाडा पोलीस ठाण्यात याप्रकरणी सप्टेंबर महिन्यात गुन्हा दाखल करण्यात आला होता, त्यामध्ये फसवणूक, फौजदारी, विश्वासघात, कट रचणे आदी कलमांतर्गत गुन्हा दाखल केला गेला असल्याची माहिती आहे.
सुनील ऊर्फ बाळा कदम, सह्याद्री रिफ्रेशमेंटचे राजीव साळुंके, सुजीत पाटकर, फोर्सवन मल्टी सर्विसेसचे भागिदार व कर्मचारी, स्नेहा कॅटरर्स, तत्कालीन सहाय्यक आयुक्त (नियोजन), इतर पालिका अधिकारी व संबंधित खासगी व्यक्तींविरोधात हा गुन्हा दाखल करण्यात आला होता. आर्थिक गुन्हे शाखेचे सहाय्यक पोलीस निरीक्षक गोपाळ लावणे यांच्या तक्रारीवरून हा गुन्हा दाखल करण्यात आला होता. या गुन्ह्याच्या आधारावर ईडी तपास करीत आहे. याप्रकरणी १८ ऑक्टोबरला सूरज चव्हाण, तसेच खिचडीचे कंत्राटदार आदी एकूण आठ जणांवर छापे टाकण्यात आले होते.
