एकाची प्रकृती गंभीर; दोन कामगारांना मुंबईत हलविले, Factory Inspector आणि DYSPकडून कंपनीची पाहणी
महाड : महाड औद्योगिक वसाहतीतील इंडो अमाईन्स लिमिटेड कंपनीत शनिवारी, 15 ऑगस्ट रोजी झालेल्या वायूगळतीत सुमारे 36 कामगारांना बाधा झाली असून एका कामगाराचा मृत्यू झाला आहे. एकाची प्रकृती गंभीर असल्याची माहिती समोर आली आहे. प्रकृती चिंताजनक असलेल्या दोन कामगारांना पुढील उपचारासाठी मुंबईकडे हलविण्यात आले आहे. प्राथमिक माहितीनुसार, कंपनीच्या प्लांटमध्ये हायड्रोक्लोरिक अॅसिडशी संबंधित प्रक्रिया सुरू असताना वायूगळती झाल्याचे सांगण्यात येत आहे. मात्र गळती नेमकी कोणत्या वायूची होती आणि तिचे तांत्रिक कारण काय, याबाबत संबंधित यंत्रणांकडून अधिकृत निष्कर्ष अद्याप जाहीर झालेला नाही.
वायूच्या संपर्कात आल्यानंतर काही कामगारांना श्वास घेण्यास त्रास, डोळ्यांची जळजळ आणि चक्कर येण्यासारखी लक्षणे जाणवल्याचे प्राथमिक वृत्त आहे. बाधित कामगारांना तातडीने महाड MIDC परिसरातील MMA रुग्णालयात उपचारासाठी दाखल करण्यात आले.
पावसामुळे परिसरातही परिणाम?
घटनेच्या वेळी परिसरात पाऊस सुरू होता. प्राथमिक माहितीनुसार पावसाच्या पाण्याबरोबर वायू किंवा त्याचे अंश प्लांटच्या बाहेरील परिसरात गेल्याने कंपनीबाहेरून जाणाऱ्या काही व्यक्तींनाही श्वसनाचा त्रास जाणवल्याचे सांगण्यात येत आहे. मात्र कंपनीबाहेरील किती नागरिकांना प्रत्यक्ष बाधा झाली, याची अधिकृत संख्या अद्याप स्पष्ट झालेली नाही. कंपनीच्या प्लांटजवळ काम करणाऱ्या कर्मचाऱ्यांवर या दुर्घटनेचा सर्वाधिक परिणाम झाल्याचे समोर आले आहे.
एका कामगाराचा मृत्यू
प्राथमिक माहितीनुसार या दुर्घटनेत अमित कुमार (वय 28, मूळ रा. बिहार) या कामगाराचा मृत्यू झाला आहे. मात्र त्यांची ओळख आणि मृत्यूचे नेमके वैद्यकीय कारण याबाबत पोलीस किंवा रुग्णालय प्रशासनाकडून अधिकृत पुष्टी अपेक्षित आहे. काही बाधित कामगारांची प्रकृती गंभीर झाल्याने त्यांना महाडमधील खासगी रुग्णालयात हलविण्यात आले. त्यापैकी दोन जणांना पुढील उपचारांसाठी मुंबईला पाठविण्यात आल्याची माहिती आहे.
Factory Inspector, DYSPची कंपनीत पाहणी
घटनेची गंभीर दखल घेत Factory Inspector तांबोळी तसेच महाडचे प्रभारी उपविभागीय पोलीस अधिकारी (DYSP) शशिकांत पवार यांनी रविवारी सकाळी कंपनीला भेट दिल्याची माहिती आहे. अधिकाऱ्यांनी कंपनी व्यवस्थापनाशी चर्चा करून दुर्घटना नेमकी कशी घडली, वायूगळतीचा स्रोत कोणता होता, सुरक्षा यंत्रणा कार्यान्वित झाली होती का आणि कर्मचाऱ्यांच्या सुरक्षेसाठी आवश्यक प्रोटोकॉल पाळण्यात आले होते का, याबाबत माहिती घेतल्याचे समजते. महाड MIDC प्रशासन आणि संबंधित औद्योगिक सुरक्षा यंत्रणांकडून या दुर्घटनेचा पुढील तपास सुरू आहे.
याच कंपनीत यापूर्वीही वायूगळती
इंडो अमाईन्सच्या महाड MIDC प्रकल्पात वायूगळतीची ही पहिलीच नोंद नाही. जानेवारी 2021 मध्ये याच कंपनीत झालेल्या वायूगळतीत सात कामगारांना बाधा झाल्याचे वृत्त प्रसिद्ध झाले होते. त्या वेळी गळती नियंत्रणात आणण्यात आल्याचे सांगण्यात आले होते. त्यामुळे ताज्या दुर्घटनेनंतर कंपनीतील औद्योगिक सुरक्षा व्यवस्था, धोकादायक रसायनांच्या हाताळणीची पद्धत, आपत्कालीन प्रतिसाद यंत्रणा आणि पूर्वीच्या दुर्घटनेनंतर करण्यात आलेल्या सुरक्षा सुधारणांचीही चौकशी होणे आवश्यक ठरणार आहे.
36 जणांना बाधा आणि एका कामगाराचा मृत्यू झालेल्या या दुर्घटनेचे नेमके कारण Factory Inspector, MIDC, पोलीस आणि संबंधित नियामक यंत्रणांच्या तपासानंतरच स्पष्ट होणार आहे.
